Улуг-Хемниң Иштии-Хем сумузунда дыштаныр хонуктарның дургузунда янзы-бүрү спортчу оюн-тоглаа болуп эртип турар.
ТР-ниң спортунуң болгаш күш-культуразының тергиини, Иштии-Хем ортумак школазының күш-культура башкызы Чойган Алексеевич Дадар-оол аныяктар аразынга "Чаа чылдың бөмбүү" деп хол бөмбүү маргылдаазын организастап эрттирген.
Чидиг демиселдиң түңнелинде, "Сүүр-Саяк" командазы күштүг согуглары-биле тиилеп үнген. Ийиги черни "Сыын-Чүрээ" командазы, үшкү черни "Шивээлиг" командазы чаалап алганнар. Иштии-Хемде хол бөмбүүнге тергиин спортчулар өзүп орар. Олар кожуунда болгаш республикада шаңналдыг черлерни чаалап ап турарлар. Ол болза күш-культура башкызы Ч.А. Дадар-оолдуң шылгараңгай ажыл-ижиниң түңнелдери.
Төрээн суурунда узун дыштанылгада Красноярск, Томск, Кызыл, Абакан, Барнаул хоорайлардан чанып келген сургуулдарывыс суурунуң арыг агаарынга мага-ханып, маргылдаага демниг оюнун көргүскеннер.
Клубта тургустунган түр дыштанылга төвүнге янзы-бүрү оюннарже, мастер-класстарже (өөк даараары, тыва танцы-сам, харжыгаштар кылыры) школачыларны хаара тудуп турар.
Аныяк өг-бүле Досумаа, Буян-Маадыр Кызыл-оолдар эки өөредилгелиг школачыларга байырын чедирип, чигир-чимистиг белектерлиг аалдап келгеннер.
Дыштаныр хүннерде волонтерлар база хол куруг олурбааннар, ТШО-да дайынчы оолдарга дузаламчы ажылын уламчылаан, сумунуң чагырга даргазы Аяна Николаевна Ажы төп штабка хирээни чедирип, хүлээткен.
Социал албан черлеринде одалга черлерин болгаш суурнуң ниити корум-чурумун тудары-биле хыналда үнүүшкүннерни организастаан.
«Улуг-Хем» солуннуң медээзинден.
