Чаа чылга чедир каш-ла хонук арткан, ынчангаш амдан эгелеп эң-не чараш, тергиин, кол-ла чүүл — бодуңарга тааржыр каас-шиник хепти шилип алырын саналдап тур бис. Байырлал хевин шилип алырда, эң-не кол чүүл – өңү. База бир кол чүүл – үнүп кээр чылдың сагыызынынга таарыштырары. Ынчап кээрге, 2024 чылдың ээзи — Ногаан Ыяш Улу. Ол Кыдатта болза эң-не ханы хүндүткелдиг тоолчургу амытан, ынчангаш бо чылды бир тускай уткуур болза эки. Чижээ, эрткен чылын бажыңга кедер ышкаш таарымчалыг, эптиг идик-хепти сүмелеп турган болза, ам — эң-не чырык, өңгүр болза-ла экизи ол.
Кызыл өң
Бо өң Чаа чыл байырлалы-биле дорт харылзаалыг. Ол ышкаш кызыл өңнү үнер чылдың кол өңү деп база санап турар. Оон ыңай ол аас-кежиктиң, күш-шыдалдың, ынакшылдың база чедиишкинниң өңү. Оон аңгыда, кызыл өңнүң янзылары үнер чылдың демдээ – Ногаан Ыяш Улуга дыка тааржыр. Ынчангаш эң-не онзагай боорда, 2024 чылдың ээзиниң күзелин хандырар деп бодаар болзуңарза, кызыл өңнүг хеп кедерин сүмелеп турар.
Чижээ, кызыл өңнүг платьеге, хөй каасталга ажыглавазын сүмелеп турар. Улу өңгүр чүүлдерге ынак-даа болза, өйүн билир болза эки.
Алдынналчак өң
Алдынналчак өң– бай-шыдалдың, чечектелиишкинниң өңү. Ынчангаш чуртталгаңарны элбекшилдиг болгаш аас-кежиктиг болдурар деп бодаар болзуңарза, Чаа чылды алдынналчак каас хептиг уткуңар. Астрологтар балык казырыы ышкаш материалдарже кичээнгей салырын сүмелеп турар: пайеткалар, стразтар, атлас. Бирээде, өңгүр, ийиде, чараш. А дизайнерлер бо материалдарның алдынналчак өңүн эң-не ажыглаарынга ынак. Азы болза алдынналчак каасталгалар кедип болур.
Ногаан өң
Ногаан Ыяш Улу чылының өңү-биле 2024 чылды уткуурга, чүгле чедиишкиннерни бээр. Ол чүгле Улунуң эвес, тайбыңның болгаш оожургалдың база өңү-дүр. Астрологтар ол өңнүң эмин эрттир чидиг өңгүр янзызын ажыглавазын сүмелеп турар. Чижээ, неон орнунга бойдус өңнери – оът-сиген, бүрү азы фисташка өңнери. Ол ышкаш Улу чылында төрүттүнген кижи ногаан өң кетпезин сүмелеп турар.
Мөңгүннелчек өң
Улунуң база бир чөпшээреп турар өңү – мөңгүннелчек. База-ла балык казырыы ышкаш пайеткалар ажыглап болур. Чижээ, кылагар юбка кеткеш, хөрээнге оожум, бөдүүн хөйлең азы болза, куш чүглери-биле каастаан топик кедиптер болзуңарза «кежээниң сылдызы» болур силер. Мөңгүннелчек аксессуарларны база утпас – туфли азы бичии клатч.
Ягаан-көк өң
Кызыл, алдын база мөңгүн Чаа чыл байырлаарының чаңчылчаан өңнери-дир. А бир эвес Чаа чыл байырлалында аалчылар аразынга ылгалыксаар болзуңарза, ягаан-көк өңнү ажыглап болур силер. Чүгле ягаан-көк өңнүң оожум эвес, өңгүр, чидиг янзызын, чижээ баклажан азы хүрең-кызыл өңнерни идик-хепке киирип болур
А. СОЯН белеткээн.
«Шын» №100 2023 чылдың декабрь 30
