ТР-ниң Одалга болгаш энергетика яамызының ажылдап кылганы «Хөмүр-даш продукциязы» КИС (күрүнениң информастыг системазы) таварыштыр Тываның чурттакчылары одаар чүүлдү садып ап эгелей берген.
Сентябрь 8-те Кызыл хоорайның чурттакчызы Ариана Салчак чаа программаны шенээн. Кызылдың Калинин кудумчузунда хөмүр-даш складындан 3 тонна хөмүрнү чаа система таварыштыр садып алган. Ариананың чугаалааны-биле алырга, «Хөмүр-даш продукциязы» КИС-ке бүрүткедиринге 20 хире минута эрткен. Каш шак болганда, хөмүр-даш садып алырынга ажыглаар QR-код «Госуслугиде» хууда кабинединге чедип келген. Ол QR-код-биле кайы-даа хөмүр-даш складындан одаар чүүлдү садып ап болур.
«QR-кодта кайы хире хөмүр-даш садып алырын, кайы хире артып каарын шуптузун айыткан чорду. Мээң бажыңымның ниити шөлү-биле санаарга, меңээ 11 тонна хөмүр-даш херек чорду. Бөгүн 3 тоннаны кандыг-даа хала чокка садып алдым. Складтың ажылдакчылары бүрүткел үезинде база дузалажып берди. ТР-ниң Одалга болгаш энергетика яамызының ажылдап кылганы чаа программа чонга эптиг байдалдарны тургускан-дыр деп санап тур мен» — деп, Ариана Салчак чугаалады.
Кожууннарда болгаш хоорай иштинде кайда хөмүр-даш склады барын ук программада айтып турар. Ол кончуг эптиг байдал-дыр.
«Хөмүр-даш продукциязы» КИС-ке бүрүткедириниң 3 аргазы бар. Бирээде, «Госуслуги» таварыштыр. Ийиде, «Госуслугиде» бүрүткели чок болза, тускай айтыг езугаар сайтыже киргеш, бүрүткедир. Үште, тус черниң чагырга черинге баргаш билдириишкин киирер.
ТР-ниң Одалга болгаш энергетика яамызының килдис эргелекчизи Адис Дондуптуң медеглээни-биле алырга, «Хөмүр-даш продукциязы» КИС-те бүрүткедип турар хамаатылар 1000 ажа берген. Бо сан хүнден хүнче өзүп турар дээрзи чугаажок. Кызыл хоорайда ниитизи-биле 20 ажыг муң одаар бажыңнар бар.
Күрүнениң ажылдап кылганы чаа программа хөмүр-даш садыг-саарылгазынга эки салдарлыг болурунга идегел бар. Хууда кижилер чаа система таварыштыр хөмүр-дашты чиигеткен өртээ-биле хостуг садып ап болур апаар.
А.ОНДАР
«Шын» №67 2023 чылдың сентябрь 9