Март 29-та Тываның Баштыңы Владислав Ховалыгның удуртулгазы-биле ажылчын бөлүк Чөөн-Хемчик кожуунче ажыл-агыйжы үнүүшкүннү кылган. Олар хоорайның чугула тудуг объектилеринге база өөредилге албан черлеринге четкен.
Чөөн-Хемчик кожууннуң төвү Чадаана хоорайда 4 школа бар. Бо хүнде ук школаларда ниитизи-биле 2408 уруг өөренип турар. Чурттакчы чонунуң саны 10 муң чедип турар хоорайга школалар, уруглар садтары ам-даа херек болбайн канчаар. Ынчангаш бо чылын Чадаана хоорайга 616 олуттуг чаа школа тудуу эгелээр.
Бо хүнде эң-не кол айты- рыг – чаа школаны каяа тудары. Эрткен чылын, чаа школа тудуун республиканың тудуг яамызы-биле шиитпирлеп турар үеде, ону хоорайдан 2 километр черге тудар кылдыр доктааткан турган. Ынчалза-даа хоорайның чурттакчы чону аңаа чөшпээрешпейн турар: хоорайдан ырак, аргыжары берге, федералдыг трасса чанында.
Ынчангаш ол айтырыгны сайгарып көөрү-биле Тываның Баштыңы Владислав Ховалыг, тудуг сайыды Аяс Хунай-оол, өөредилге сайыды Елена Хардикова, Чөөн-Хемчик кожууннуң чагырга даргазының хүлээлгезин күүседип турар Чойган Монгуш баштаан ажылчын бөлүк көрдүнген участоктарны кезип көрген. Каш аңгы участоктарның эң-не таарымчалыы – Чадаана хоорайның эрги АТБ-ниң девискээри болуп турар. Аңаа чаа школаны тудуптар болза, хоорайның хевири чаарттынып, эргижирээн бузунду бажыңнар орнунга чараш, чаа школа көстүп кээр. Ол ышкаш уруглар аай-дедир дажыыр автобустар айтырыы база шиитпирлеттине бээр.
Эрги АТБ-ниң девискээриниң чартыы хуу, бир чартыы муниципалдыг өнчүге хамааржыр. Тус черниң чагырыкчызының чугаазы-биле алырга, ол девискээрниң ээлери-биле садыглажыышкын айтырыгларын чугаалажып турар.
Чаа школаны хоорайдан 2 километр черге тудар болза, тудугга эң-не таарымчалыг чер ол дээрзин «Восток» КХН-ниң чиңгине директору Сергей Уюсов чугаалаан: «Улуг девискээрге амгы үениң чаа школазы, улуг стадион, уруглар сады дээш өске-даа чаа объектилер туттунуп болур. Ындыг-даа болза бирги черде ажы-төлдүң айыыл чок чоруун көөр бис. Тываның кыжы узун, хүн дурту кыска, караңгы үелерде школачыларга аргыжарынга берге байдалдар тургустунуп кээр».
Чоокку үеде бо айтырыг шиитпирлеттине бээр дээрзинге бүзүрел улуг. Чер айтырыы шиитпирлеттинерге-ле, тудуг ажылдары бо чылын эгелээр. Чадаананың школачылары 2024 чылда амгы үениң чаа школазынче өөренип кирер.
/ Алдынай СОЯН.
Самба НОРБУЖУКТУҢ тырттырган чуруктары.
"Шын" 2023 чылдың апрель 1 №23
#Шын #ТываЧазак #ТываныңБаштыңы #ЧөөнХемчик #Чадаана #ШколаТудуу
