Республиканың Баштыңы Владислав Ховалыг туризм талазы-биле агентилелге чаа удуртукчуну томуйлаарының дугайында чарлыкка атты салган.
Туризм адырынга чээрби ажыг чылдар ажылдаан арга-дуржулгалыг менеджер Эртине Ондар-оолга бүзүрелди ол берген.
Социал-культура ажыл-чорудулгазын кылып чораан 47 харлыг Эртине Ортун-оолович Ондар-оол Улан-Удэ хоорайда Чөөн-Сибирьниң күрүнениң культура болгаш уран чүүл академиязынга туризм талазы-биле менеджер мергежилди чедип алган.
1998 чылда-ла Төөгү, культура тураскаалдарын камгалаар комитетке, тускайжыттынган туризм килдизинге туризм талазы-биле практиктиг арга-мергежилдерни шиңгээдип эгелээн. Дараазында чылдарда ТР-ниң Күрспорт комитединиң чанында Туризм департаментизинге, «Туватуризм» КУБ-ка, Тыва Республиканың Экономика яамызының Туризм талазы-биле департаментизинге, ТР-ниң Садыг болгаш амыдырал-хандырылга болгаш сайгарлыкчы чорук хөгжүлдезиниң яамызынга ажылдап, республикага туризм хөгжүлдезин организастаар болгаш ону боттандырары-биле харылзаалыг албан-дужаалдарга аңгы-аңгы чылдарда ажылдаан.
Турисчи фирманы ажыдып база ажылдадыр арга-дуржулгалыг, «Экотува-Тур» КХН-ни үндезилеп тургускан. Туризм адырынга ажылдаан чылдарында чурттуң болгаш даштыкының улуг туроператорлары-биле доктаамал быжыг харылзааны тудуп турган.
ТР-ниң Чазааның парлалга албаны.
«Шын» №76 2023 чылдың октябрь 7