«Ростех» күрүне корпорациязының «Техмашсервис» компаниязы Тывага эмульсия дузазы-биле частыр бүдүмелдерниң частыычал эвес кезектериниң бүдүрүлгезин эгелээн. Ооң дугайында Тываның Баштыңы Владислав Ховалыг дыңнаткан.
Ук төлевилел республикага чаа-чаа ажылчын туруштарны болгаш чоннуң орулгазының деңнелин көвүдедир, а ол ышкаш болбаазырадылга үлетпүрүнүң бүдүрүлге хемчээлдерин улгаттырар.
«Чаа заводтуң ажылы 2035 чылга чедир Сибирьниң хөгжүлдези деп эчис сорулгаларже кирген төлевилелдерниң боттанылгазынга салдарлыг болур” — деп, губернатор демдеглээн.
Төп-Евразийжи коридорну хевирлеп тургузарының арга-шинектериниң дугайында Президентиниң даалгаларын удуртулга болдургаш, республиканың девискээрин таварыштыр Россия — Моол — Кыдат аразының кызыгаар кежилдир маршрудун тургузарының дугайында саналды Тыва киирип турар.
«Ол болза Кыдаттың барыын болгаш төп кезектеринче барааннарны чедирериниң эң дорт оруу болур. Чазын Красноярскыга болган шуулганга «Техмашсервис» компаниязының удуртулгазы бистиң кызыгаар чоогунда «Хандагайты – Боршоо» эрттирилге черинге тургузар деп турар онза экономиктиг зонаже бактаап кирер деп турар сорулгалыын бадыткаан. «Техмашсервис» экспортка сонуургалдыг. Моолдуң бүдүрүлге черлери ооң продукциязынга сонуургалын илереткеннер” — деп, Тываның Баштыңы түңнээн.
/ А. ХЕРТЕКбелеткээн.
Чурукту интернеттен алган.
“Шын” №92 2023 чылдың декабрь 2
