Чакпыыл арага-дары садыглаашкынын кезе шавары-биле, декабрь 4–10 хүннеринде Тывага «Чакпыыл арага» деп профилактиктиг акция болуп эртер.
Мооң мурнунда бадылаттынган даңзыга чөрүштүр арага-дары кылыгларын хоойлу-дүрүм сагывайн садып-сайгарып турар черлерни, республиканың чер-черлерде чагырга черлериниң девискээрлеринге хыналдаларны чорудар.
Оон аңгыда, Тываның өөредилге черлеринге араганың, таакпының, наркотиктерниң хоразының дугайында лекцияларны номчуп, амыдыралдың кадык овур-хевирин суртаалдаар.
Чакпыыл арага-дары киир сөөртүлгезин кезе шавары-биле, Барыын-Хемчик кожууннуң «Ак», Чөөн-Хемчиктиң «Чадаана», Чаа-Хөлдүң «Ак-Туруг», Тес-Хем кожууннуң «Самагалдай» деп корум-чурум тудар черлеринге улусчу дружиналар-биле кады дежурныйлаашкынны күштелдирер.
«Шын» №93 2023 чылдың декабрь 6