Кызылда немелде өөредилге төвүнүң бичии шыдыраачыларының аразынга Шагаа–2024-ке тураскааткан дүрген шыдыраага шылгалдалыг маргылдааны Долзат Наксылдың ада-иези удуртуп, өөрүшкү-маңнайлыг, бедик деңнелге эрттирген.
Маргылдааның түңнелинде 1–2 дугаар чыл ойнап чоруур оолдар аразынга 1 дугаар черни Али Чооду алгаш, тии-лекчи болган. 2–3 дугаар черлерге Джампел Санай база Дугар Канчыыр төлептиг болганнар. Дараазында 2–3 чыл ойнап чоруур өөреникчилер аразынга Мөңгүн Сарыг-Лама тиилекчи болган. 2–3-кү черлерни Аюш Ондар биле Күдер Ондар алганнар. Уруглар оюнунга Ананда Донгак 1-ги черни, 2–3-кү шаңналдыг черлерни Амелия Оюн биле Дина Допай үлешкеннер.
Чараш тыва хеп дээш шилилгеге Ачыты Күжүгет биле Доржаа Тейнин тускай шаңналга төлептиг болганнар.
Маргылдааның кол шииткекчизи Сергей Ыймажапович Түлүш шыдыраа спортун Россия иштинге сайзырады-рынга киирген бедик түңнелдиг ажылы дээш Россияның шыдыраа чөвүлелиниң президентизи А.В. Филатовтуң Хүндүлел бижиин алыр аас-кежиктиг болган. Бо тренер башкы чаа үениң шыырак дээн сылдыстары: Тамерлан Чындыгыр, Шуру Ондар, Арина Иргит, Анастасия Ооржак, Болат Бадыраа дээш оон-даа өске спортчуларны белеткээн. Бо чалыы шыдыраачыларның аразындан спорт мастерлери база гроссмейстерлер үнеринге бүзүрээр бис.
Алексей ЧАМБАЛ-ООЛ.
“Шын” №12 2024 чылдың февраль 16
