Делегей чергелиг хостуг хүреш маргылдаазы Красноярск хоорайга ноябрь 3–4 хүннеринде болган.
Спортчу хемчегни олимпий оюннарыныӊ үш дакпыр чемпиону, чечен чоннуӊ сураглыг мөгези Бувайсар Сайтиевке тураскаадып эрттирген. Аӊаа Россияныӊ 26 регионнарындан болгаш Казахстан, Азербайджан, Армения, Киргизия, Индия, Греция, Моол, Таджикистан, Ирандан шупту 300 ажыг чалыы мөгелер күжүн шенеп хүрешкеннер.
Ук маргылдаага бистиң республикадан 13 чалыы спортчулар киришкен.
Европа чергелиг маргылдаага 16 харга чедир оолдар аразынга тиилээн Чингиз Сарыглар бо удаада 45 кил деӊзилиг мөгелер аразынга шүглүп, удурланыкчыларын чиик ажып эрткеш, бирги черни чаалап алган. Ол — тренер Меӊги Моӊгуштуң өөреникчизи. А тренер Аганак Сарыгларныӊ өөреникчизи Найыр Ооржак 42 кил деӊзилиг мөгелер аразынга бүзүрелдии-биле бирги черни алган.
Делегей чергелиг хостуг хүреш маргылдаазыныӊ тиилекчилери болган чалыы спортчулар кайызы-даа Чадаананың Чечен-оол Моӊгуш аттыг олимпийжи курлавыр школазының чалыы мөгелери.
Алексей ЧАМБАЛ-ООЛ.
Чурукту интернет четкизинден алган.
«Шын» №89 2023 чылдың ноябрь 22
