Июнь 8–10 хүннеринде Тывага Коми Республиканың күрүнениң ойнаар-кыстар театры аалдап кээп чораан. РФ-тиң Культура яамызының планы ёзугаар “Росконцерт”-тиң “Улуг гастрольдар” деп төлевилелин “Уруглар болгаш аныяктар театрларын деткиири” угланыышкын-биле «Каша из топора», «Сказка о рыбаке и рыбке» база «Пеппи Длинный чулок» деп шиилерни чаштарга бараалгаткан.
2025 чылда Коми Республиканың бо театры 70 чыл оюн демдеглеп турар. Ооң Тывага гастрольдары – юбилейлиг хемчеглериниң бирээзи. Үш хонук дургузунда көргүскен шиилерни ниитизи-биле 768 бичии көрүкчү сонуургап көрген.
Республиканың чаштарынга чайгы дыштанылгазында онза белек болган шиилерни Коми Республиканың ойнаар-кыстар театрының директорунга баштаткан үн режиссёру, костюм, чырык, хөгжүм каастакчылары болгаш артистер, ниитизи-биле 13 кижи составтыг театр көргүскеш, чаштарны өөрткеш барган.
Бистиң корр.
Тываның күрүнениң ойнаар-кыстар театрының медээзи болгаш чуруктары.
“Шын” № 23 2025 чылдың июнь 19
