Республиканың Көдээ ажыл-агый яамызының сөөлгү медээзинден алырга, бо чылын тарылганың ниити шөлү 50,3 муң гектар болур.
Ооң 77 хуузу колдуунда мал чеми. Чер ажылдыглар 35,3 муң гектар черге мал чеминиң үрезиннерин чажар, 2,7 муң гектарга картофельди база 0,443 муң гектар черге ногааны олуртурлар. Тараа чажылдазының эң улуг хемчээли Таңды кожуунга онаашкан— 3,020 муң гектар азы тараа тарыыр шөлдерниң 40 хуузу.
Агаар-бойдустуң медээлеринге болгаш агротехника хуусааларга дүүштүр алырга, тарааның болгаш мал чеминиң үрезиннериниң чаштырылгазы июнь 10-га чедир, а картофельдиң база ногаа аймааның олуртулгазы июнь 20-ге чедир доостур. Чамдык ажыл-агыйлар ам безин көдээ ажыл-агый культураларын чажып алган. Сезоннуг ажылдарның бетинде Көдээ ажыл-агый яамызы көдээниң ишчилерин үрезин-биле хандырар. Бо хүннерде тарааның база мал чеминиң 611 тонна үрезинин чедирип алган.
Ол ышкаш хову-шөлдерде шык базырылдазы уламчылап турар. Сөөлгү медээлерден алырга, бо талазы-биле ажылдарны Бии-Хем, Улуг-Хем, Таңды база Кызыл кожууннарда дооскан. Часкы хову ажылдарынга ниитизи-биле республиканың 160 ажыл- агыйы киржип турар, сезоннуг ажылдарда 1120 кижини хаара туткан.
«Шын» №35 2024 чылдың май 15
