Тыва Республиканың ажыл-чорудулганың чамдык хевирлеринге лицензия бээр база хайгаараар албаны республиканың корум-чурум камгалаар органнары-биле кады, 2023 чылда арага продукциязын үүрмектеп садар адырда 278 чурум үрээшкиннерин илереткен.
Лицензия бээр албанның ажылдакчылары кирген ведомстволар аразының рейдилери республиканың чурттакчылыг черлеринче, ол ышкаш «Ак» биле «Шивилиг» орук-патруль албанының постуларынче неделя санында үнүп, 32 муң ажыг литр чажыт арага продукциязын хавырган. Албанның удуртукчузунуң албан-хүлээлгезин күүседип турар Эртине Намдан хайгаарал ведомствозунуң эрткен чылда ажыл-чорудулгазының түңнелдерин коллегия хуралында илеткээн.
Албанның корум-чурум камгалаар органнары-биле кады дээштиг ажылының сөөлгү болуушкуну январь ортан үезинде «Шивилиг» постузу таварыштыр 1185 литр пиво продукциязын эрттирип бар чорда, илереткеш, хавырганы болур.
2022 чылдан бээр албанның хыналдалар эрттирерин кызыгаарлаан-даа болза, ажылдакчылар профилактиктиг хемчеглерни уламчылап турар. Кызыл хоорайда база Эрзин кожуунда үш садыг чаңгыс эвес удаа чурум үрээш, лицензиязын алдырткан, Кызыл хоорайда «Кайлас» ресторанының арага продукциязы үүрмектеп садар лицензиязын күш чок болдурган.
Арага продукциязы садып-саарар адырда хоойлу-дүрүм үрекчилеринге 280 муң рубльга административтиг торгаалды салган.
Республика девискээринде арага продукциязын садып-саарар чөпшээрелдиг 72 организация бар, оларның эң хөйү Кызыл хоорайда. 2023 чылда Албан арага продукциязын үүрмектеп садар адырдан 6,6 сая рубль хемчээлдиг үндүрүгге хамаарышпас орулганы республика бюджединче киирген, эрткен чылдың ол үезинге деңнээрге, 5 катап хөй. Арага продукциязынга акцизтерни үлээш, арага продукциязын ажык-чарлыг садып-саарганындан республика бюджединче 139,2 сая рубльди киирген, планны 28 хуу азы 30,3 сая рубльга ажыр күүсеткен.
Тыва Республиканың ажыл-чорудулганың чамдык хевирлеринге лицензия бээр база хайгаараар албанның ажыл угланыышкыннарының бир хевири – арага продукциязын үүрмектеп садып турарынга чөпшээрел барын хынаары.
Бистиң корр.
“Шын” №8 2024 чылдың февраль 3