Эрткен неделяда «Чурттаар оран-сава болгаш хоорай хүрээлели» деп национал тѳлевилел ёзугаар туттунган эргижирээн, чурттаарынга таарымча чок байдалыг бажыңнардан хамаатыларны кѳжүрери-биле Первомайская кудумчузунда 18 квартиралыг ийи бажыӊны байырлыг байдалга дужаар хемчег болуп эрткен. Чаа туттунган бажыңнарда квартиралар амгы үениӊ стандартынга дүүшкен, бажыӊныӊ девискээрин чаагайжыдып, чадаг кижи кылаштаар орукту асфальтылаан, машина тургузар девискээрни болгаш уруглар ойнаар шѳлдү кылып каан.
Тываныӊ Чазааныӊ оралакчызы Олег Лукин чаа бажыӊ алган чурттакчыларга төөгүлүг болуушкун таварыштыр байырны чедирип, чаагайжыды туттунган квартираларныӊ дүлгүүрлерин тыпсып, чурттакчыларга аас-кежикти, чаагай чолду күзээн.
Хову-Аксында эргижирээн, чурттаарынга таарымча чок байдалыг бажыӊнарны бузар ажылдар 2017 чылдыӊ январь 1-ден тура чорудуп турар. Тудуг яамызыныӊ медээзи-биле алырга, чүгле бо чылын ийи муӊ ажыг аварийлиг дөрбелчин метрни бузары кѳрдүнген. Бо чылдыӊ тѳнчүзүнде суурнуӊ 33 ѳг-бүлези чаа бажыӊнарны алыры кѳрдүнүп турар.
Тывада боттанып турар национал тѳлевилел ёзугаар 2013—2022 чылдарда аварийлиг чуртталга фондузунуӊ чурттакчыларын кѳжүрер республиканыӊ адрестиг программазы база 2019—2023 чылдарда боттандырар «Амыдыраарынга таарымча чок чуртталга бажыӊнарны кызырар туруштуг хандырылгазы» регионалдыг тѳлевилел чедимчелиг боттанган. 2012 чылдыӊ январь 1-ге чедир аварийлиг фондунуӊ 6 муӊ ажыг чурттакчылары чаа квартираларны алган. Оларга 54 бажыӊны тудуп, ажыглалга киирген.
Чоокку үеде 1200 ажыг кижини Кызыл, Чадаана, хоорайжыткан Каа-Хем суур, Бай-Хаак, Хандагайты, Хову-Аксы суурларынга туттунар бажыӊнарже кѳжүрери кѳрдүнүп турар деп Тудуг яамызы дыӊнаткан.
Чуруктарны интернет четкизинден алган.
