Чыл кандыг эрткенил?
Кызыл кожууннуң Б.И. Араптан аттыг Сукпак ортумак школазының башкызы Сай-Суу Тюлюш:
– 2023 Кодан чылы дыка-ла чымыштыг, дүжүттүг чыл болган деп түңнеп тур мен. Чылдың-на болуп турар «Чылдың башкызы» мөөрейге киришкеш, «Төрээн дылга мастер-класс» деп номинацияга 1-ги черни алдым. Оон аңгыда, башкылар аразынга кожуун чергелиг мөөрейге 2-ги черге төлептиг болганым – аныяк башкыга меңээ канчаар-даа аажок улуг аас-кежик деп санаар-дыр мен. Мөөрейлерге киришкеш, кижи бир-ле чаа чүүлдү өөренип алыр. Ынчангаш мөөрейлер өзеринге тепкииш болур. Кожуун чергелиг «Эң-не тергиин видео-кичээлим» деп мөөрейге киришкеш, тиилекчи болдум.
Башкы кижиге өөреникчилериниң чедиишкиннери – ооң шаңналы. Бо чылын 1-ги классчылар аразынга «Сылдыстар клазы» деп мөөрейге база «Алдын күс» байырлалында 1 дугаар черни өөреникчилерим-биле алдывыс. Черле ынчаш, ажылдап турар школамда янзы-бүрү хемчеглер чүгле бо чылын эвес, а өске чылдарда-даа кончуг бедик деңнелде эртип турар.
Ажылымдан аңгыда, өг-бүлемге база чедиишкинниг чыл болган. Уругларывыс– Салгал үшкү, а Аялга алдыгы класста Сукпак ортумак школазында эки өөренип турарлар. Ажы-төлүвүс-даа, ийи бодувус-даа янзы-бүрү спортчу хемчеглерге киришкеш, шаңналдыг черлерни бо Кодан чылында алдывыс. Черле ынчаш, ниитизи-биле эки чыл болду. Үнүп орар Улу чылы-биле изиг байыр чедирип, кадыкшылды, аас-кежикти, хөй-хөй чедиишкиннерни бүгүдеге күзедим!
Айдың ОНДАР.
«Шын» №100 2023 чылдың декабрь 30
