Алдын-Ча Хууракпан Тываны төлээлээр
“Ада-чурт камгалакчылары” фондунуң Тывада салбырынга тускай шериг операциязының хоочуннарының аразынга Бүгү-российжи шыдыраа маргылдаазының шилилге чадазы болуп эрткен. Аңаа Кызыл хоорайдан, Кызыл, Чеди-Хөл, Чаа-Хөл, Таңды, Каа-Хем, Чөөн-Хемчик база Эрзин кожууннардан ниитизи-биле 16 дайынчы киришкен.
Маргылдааны швейцар система-биле 6 турлуг эрттирген. Маргылдааның Бүгү-российжи түңнел чадазынга киржир эргени Бай-Хаактан Алдын-Ча Хууракпан чаалап алган. Ол дайынчы 55-ки мото-адыгжы бригададан бир ай бурунгаар халашкан. Алдын-Ча бичиизинден-не шыдыраага сонуургалдыг, кожууннуң школачы шыдыраа маргылдааларынга тиилеп турган. Сөөлгү үш чылда, ТШО девискээринге дайынчы даалгалар күүседип турар үезинде, шыдыраа ойнавайн турган.
“Шыдыраага ойнаарын ачам өөредип каан. Ол немелде өөредилге төвүнге шыдыраа башкызы кылдыр ажылдап турган. Университет соонда бодум күш-культура болгаш шыдыраа башкызы кылдыр ажылдап турдум. Меңээ кол-ла чүүл — бөгүн тиилеп алыры турду!” — деп, шыдыраачы бодунуң өөрүшкүзү-биле үлешкен.
Ук маргылдааны Тиилелге хүнүнге тураскаадып эрттирген. Организакчылары Тыва Республиканың Шыдыраа федерациязы биле “Төрээн чурт камгалакчылары” фондунуң Тывада салбыры “Тиилелгениң көжүү” деп акцияның иштинге эрттирген.
ТШО хоочуннарының аразынга бирги Бүгү-российжи маргылдааның түңнели июль 30-31 хүннеринде Нижний Тагилге болур.
Хөм бөмбүк
Республикага май 3-8 хүннеринде “Школада футбол” деп Бүгү-российжи төлевилелдиң чорудуу-биле чалыы футболчуларны шилээн. Өөреникчилер аразынга маргылдааны ийи аңгы назы-хар аайы-биле эрттирген: 2012-2013 болгаш 2014-2015 чылдарда төрүттүнген оолдар, уруглар аразынга.
27 оолдар командазы база 12 кыс уруглар командазынга ниитизи-биле 170 чалыы спортчулар киришкен. Маргылдаалар изиг-изиг адааннажылга-биле эрткен. Чалыы спортчулар тергиин техниказын, тактиктиг билиин, демниин база сагылга-чурумнуун көргүскен.
Бирги категорияга оол командалар аразынга алдын медальды “Олимп” школачы спортчу клуб (Кызылдың 1 дугаар школазы), мөңгүннү “Чүткүл” спортчу клуб (Ак-Довурактың “Өлчей” лицейи), хүлер медальды “Металлург” спортчу клуб (Чеди-Хөл кожууннуң Хову-Аксы школазы) алганнар.
Кыс уруглар: алдын — “Чалама” спортчу клуб (Улуг-Хем кожууннуң Чааты школазы), мөңгүн — “Сүлде” спортчу клуб (Тере-Хөл кожууннуң Куңгуртуг школазы), хүлер — “Мөңгүн” спортчу клуб (Кызылдың 22 дугаар школазы).
Ийиги категорияга оолдар аразынга алдын медальга “Хартыга” спортчу клуб (Ак-Довурактың 3 дугаар школазы), мөңгүн медальга “Старт” спортчу клуб (Кызылдың 5 дугаар гимназиязы), хүлерге “Олимп” спортчу клуб (Кызыл кожууннуң Каа-Хем суурнуң 2 дугаар школазы) төлептиг болганнар.
Кыс уруглар: алдын — “Буура” спортчу клуб (Шагаан-Арыгның 1 дугаар школазы), мөңгүн — “Өңнүктер” спортчу клуб (Чадаананың 3 дугаар школазы), хүлер — “Мөңгүн” спортчу клуб (Кызылдың 22 дугаар школазы).
“Школада футбол” төлевилел уругларны идепкейлиг болгаш кадык амыдыралче хаара тудар талазы-биле регионда чедиишкинниг ажылдап турар.
“Чылдан чылче мындыг маргылдаалар делгемчип турары өөрүнчүг-дүр. Школачыларның футболга сонуургалы өзүп, командалар саны көвүдеп база белеткелиниң деңнели бедип турарын көрүп тур бис. Оларга спортка ынакшылды оттуруп база маргылдааларга эки белеткеп турары дээш башкыларынга болгаш тренерлеринге өөрүп четтирер-дир бис. Мурнувуста чаа маргылдаалар болгаш чаа тиилелгелер манап турар!” — деп, маргылдааның координатору Таймир Күжүгет чугаалаан.
Республикада “Школада футбол” төлевилел 7 хардан 18 хар чедир 15 муң ажыг уругну хаара тудуп турар. 172 школаның баазаларында школачы спортчу клубтар ажылдап турар.
/ Бистиң корр.
Медээлерни болгаш чуруктарны ТР-ниң Спорт база Өөредилге яамыларының, “Төрээн чурт камгалакчылары” фондунуң Тывада салбырының социал четкиде арыннарындан алган.
“Шын” №18 2026 чылдың май 14
"Шын" солуннуң МАХ-каналынга каттыжыңар max.ru/join/egenQ...