Август айда Москва хоорайга кадыым байдалының аайы-биле эмчилээш, улаштыр кезиишкин эртим. Мени эмнеп, кескен эмчим Айдыс Вячеславович Ондар.
Интернет таварыштыр консультациялааш, байдалымны чугаалаарымга, дарый чедип келирин сүмелээш, кандыг анализтер дужаарын, кандыг документилер долдуруп эккээрин айтып берген. Эмчиниң айытканы езугаар шуптузун кылдым. Кезиишкинни эки эрткеш, бо хүннерде Тывамче чанып келдим.
Айдыс Вячеславович Москвада чүгле кезер эмчи эвес, а салбыр эргелекчизиниң хүлээлгезин база күүседип турар болду. Чаңгыс чер чурттуувустуң ажылдап чоруур эмнелгезиниң арыг-силиин, ажылдакчыларының эвилең-ээлдээн, кижилерге кичээнгейлиин, чеминиң экизин магадап, мактап, сонуургап, өөрдүм.
Шынап-ла, шыңгыы негелдези, шынарлыг күш-ажылы-биле депшип ажылдаан эмчивис Айдыс Вячеславовичиниң бодунуң кижизиин, биче сеткилдиин магададым. Негелдези-даа шыңгыы, эмнээри-даа шыырак деп мактап турарын ажылдакчыларындан-даа, аарыг улустан-даа дыңнадым. Бодум база көрдүм. Эмчивис Айдыс Вячеславовичиниң ада-иезинге, төрел аймаанга оглун эки кижизиткени дээш четтиргеним илередип, черге чедир мөгейдим.
З. КУЛДУН.
Эрзин кожуун
«Шын» №68 2023 чылдың сентябрь 13