Чиигелделиг ипотеканы уламчылаарын чедип алган

Тываның Баштыңы Владислав Ховалыг Тывага чиигелделиг ипотеканы уламчылаарын чедип алганының дугайында социал четкиде бодунуң арнынга бижээн.

«Тывага чиигелделиг ипотеканы боттандырарының механизмин чедир ажылдаарын уламчылап тур бис. Чамдык кол чүүлдерде дугуржулга чоруп турар. Кол чүүл – 2 хууну камгалап алыр аргалыг болдувус. Мындыг берге үеде Президентивис Владимир Владимирович Путинниң деткимчези-биле бистиң республикага хөй ажы-төлдүг, ооң иштинде аныяк өг-бүлелерге чурттаар оран-сава садып алыр арганы бээр эң-не чугула программаны уламчылаарын чедип алганывыска өөрүп тур мен.

Республикага чурттаар оран-сава тудуун чиигелделиг ипотека элээн диргизипкен. Сөөлгү каш чылдар дургузунда Тывага тудугнуң темпизин, ооң иштинде Тываның социал-экономиктиг хөгжүлдезиниң тускай программазының ачызында (ИПСЭР), улгаттырар аргалыг болдувус. Ооң ачызында республикага боттуң тудуг материалдарын бүдүрер ажыл-агый шуудап турар. Республикадан дашкаар тудуг материалдарын сөөртүрүн эвээжедир аргалыг болган. Ол дээрге-ле, тудугнуң хуусаазы болур. Тудуг материалдарын манаар ужурга таваржыр, ажыл туруптар чүүлдер эвээжээр. Тудугнуң кыска сезонунда ол чүүл ёзулуг чөптүг шиитпир болган. Тудуг адырының хөгжүлдезинге ол улуг өскерлиишкиннерни болдурган. 2024 чылда субсидия алыкчылары хуу тудуг организацияларының чагыы-биле 70 муң куб метр бетонну, 6 млн тууйбуну болгаш 100 муң куб метр инерциялыг материалдарны (шишкииш, үүрмектээн даш, элезин) бүдүрүп үндүрген.

Бүдүн чуртта ышкаш бистиң регионга база боттанып эгелээр бир чугула хемчег - ТШО киржикчилериниң аныяк өг-бүлелеринге чурттаар оран-сава садып алыр деткимче болур. Олар чурттаар оран-сава садып алыр азы тудуп алырынга социал төлевирлерни бирги оочурда алыр. Ол төлевирлер аныяк өг-бүлелерни деткиир программаның иштинде кирип турар. Ооң кол негелдези – өг-бүле чурттаар оран-савазын экижидеринге хереглелдиг болур ужурлуг. Деткимчениң акшаларын чурттаар оран-савазын улгаттырарынче, чаа бажың садып алырынче азы ипотека чээлизин дуглап алырынче угландырар. Бо хүнде бистиң Тудуг яамызы ындыг өг-бүлелерниң даңзызын белеткеп турар. Чогуур албан черлер федералдыг айтыышкын ёзугаар тайылбыр ажылын чорудар ужурлуг».