Орёл хоорайга Россияның бирги чери дээш 18 харга чедир оолдар аразынга хостуг хүреш маргылдаазы болуп эрткен.
Аңаа бистиң республикадан 20 элээди оол хүрешкен. Оларның аразындан чаа-ла өзүп олурар салым-чаяанныг мөгевис Чиңгиз Сарыглар удурланыкчызы болур Москваның мөгези Агаширин Агашеринов-биле ачыр-дачыр хүрешкеш, чүгле 2 санны алыскаш, 2 дугаар черге төлептиг болган. Бир эвес бистиң республикага Дагестан, Москва, Осетия, Чечняда ышкаш шыырак оолдарны чыггаш, тускай школага, академияга белеткээр болза, бистиң бичии мөгелеривис улуг чедиишкиннерлиг, тиилелгелерлиг болурунга бүзүрел бар. Бо удаа база-ла Чадаананың Чечен-оол Монгуш аттыг олимпийжи курлавырлар спорт школазы шылгараан. Чингиз Сарыгларга Европаның бирги чери дээш маргылдаага чедиишкинниг хүрежип, бирги черни алырын күзеп, йөрээлди салдывыс.
А.ЧАМБАЛ-ООЛ.
Авторнуң тырттырган чуруктары.
«Шын» №25 2024 чылдың апрель 3
