Регионнуӊ четкизинде меге медээлерниӊ саны эвээжеп турар дээрзин Тываныӊ Регион башкарар төвү (ЦУР) дыӊнаткан.
Ноябрь 22-де «Фейктер дугайында диалог» деп делегей чергелиг шуулганны «Диалог Регионы» автономнуг коммерциялыг эвес организация удуртуп эрттирген. Ниити чуртка хамаарыштыр, эрткен чылдыӊ көргүзүглери-биле деӊнээрге, бо чылын регионнарда меге медээлер 78 хуу көвүдей берген дээрзин аӊаа илеткээн. Меге медээлерниӊ көвүдей бергениниӊ чылдагаанын болгаш шын эвес медээни тарадырын болдурбас талазы-биле хемчеглер дугайында шуулганга сайгарып чугаалашкан.
«Россияга медээлерниӊ шын-мегезин хынаар специалистер бөлүүн тургузары бистиӊ кол кылыр ажылывыс-тыр. Фактчекинг — медээ, дыӊнадыышкыннарныӊ факт-барымдаазын хынаары медиакоммуникацияныӊ чарылбас кезээ болур ужурлуг. Меге медээлер социал-политика талазы-биле айыылдыг болган төлээде, специалистер бөлүүн тургузуп алыры күрүнениӊ стратегиялыг сорулгаларынга дүгжүп, медиа организацияларныӊ эрге-ажыктыг сонуургалдарын камгалап турар» — деп, «Диалог» биле «Диалог Регионы» организацияларныӊ чиӊгине директору Владимир Табак тайылбырлаан.
Владимир Табактыӊ сөзү-биле алырга, меге медээлер хөй нуруузунда регионнарга хамааржыр. Меге медээлер талазы-биле Мурнуу федералдыг округтуӊ субъектилери болгаш Төп федералдыг округтуӊ кызыгаар чоогунда кезек регионнары лидерлеп турар хевээр.
Тыва Республика шын эвес медээлер хөлүн эрттир көвүдеп турар субъектилерниӊ санынче кирген. 2022 чылда 8 медээни, бо чылын 4 медээни шын эвес дээш буруу шаап, парлалгага чарлаан.
«Меге медээлер чүнүӊ-даа мурнунда чон аразынга дүвүрел тургузар сорулгалыг болур. Тываныӊ Регион башкарар төвү Чазак-биле кады ындыг меге медээлерни хынамчалыг көрүп турар. Информация черлериниӊ шуптузун хынап, мониторинг чорударга, шын эвес медээлерни дарый эскерип кааш, ону буруу шаап чарлаар аргалыг болур. Бистиӊ кол кылыр ажылывыс дээрге чурттакчы чонувуска чөптүг шын, илдеӊ көскү болгаш айыыл чок медээлер тургузары» — деп, Тываныӊ Регион башкарар төвүнуӊ удуртукчузу Идегел Тумат демдеглээн.
Тываның Регион башкарар төвүнүң медээлеринден Р. Демчик белеткээн.