Чайгы үеде уруглар дыштанылгазын, корум-чурум айтырыгларын Туран хоорайныӊ чурттакчыларыныӊ чыыжынга сайгарып чугаалашкан.
Хуралга Бии-Хем кожуун чагыргазыныӊ, эрге-хоойлу камгалаар органнарныӊ ажылдакчылары болгаш кожууннуӊ прокурору Лилиана Донгак киришкен.
Эрткен чылдыӊ статистиказы-биле деӊнээрге, бо сөөлгү беш ай дургузунда 58 кем-херек демдеглеттинген. Өcке кижиниӊ кадыкшылынга сагыштыы-биле аар хора чедиргени – 5, аар болгаш онза аар кем-херектер үүлгеткени – 14, оор чорук – 15, мал оору – 8, телефон оорлааны 3 кем-херек болган дээрзин тус черниӊ чагырга төлээлери дыӊнаткан.
Чамдык кижилерниӊ арагалаар чорукка сундугуп турары, ооӊ түӊнелинде үүлгедиглерниӊ болу бээри эӊ-не берге айтырыг болуп артпышаан. Суурларга улусчу дружиналарны чедиишкинниг организастаары кем-херек үүлгедиишкиннерин эвээжедиринге чугула черни ээлээр. Туран хоорайда улусчу дружиналарны ажылын таарыштыр тургузарын уламчылаар.
Бии-Хем кожууннуӊ төп эмнелгезиниӊ акушер-гинекологу Елена Анпилогова уругларныӊ эр-херээжен харылзаа тудар үезиниӊ дугайында чугаалап, кижизидилгеже кичээнгей салырын тайылбырлаан. Кыс уругларныӊ эртежик саатталып турары дүвүренчиг апарган. 2021 чылда назы чептээн 3 уруг, 2022 чылда 5 уруг божаан, а 2023 чылдыӊ 6 ай иштинде элээди назылыг 5 уруг сааттыг болган. Оларныӊ бирээзи 18 хар четпээн, ол 2 дугаар уруун божаан дээрзин ол медеглээн.
«Берге байдалдыӊ кол чыдагааны болза ада-иениӊ уругларын чедир хайгаарап көрбейн турарында. Бичии кыс уруглар дүрген улуг кижи болуксап, бот-башкарлып амыдырап эгелеп турар. Ынчангаш уруглары-биле эки билчип чугаалажып, оларныӊ эӊ-не чоок кижизи болур ужурлуг» — деп, эмчи тайылбырлаан.
2022 чылда кожуунга өрттуӊ салдарындан кижилер когаравайн турган болза, бо чылын өрт үезинде 2 кижи мөчээн, 4 кижи кемдээн. Айыыл-халап болдурбазы-биле өртке удур айыыл чок чоруктуӊ дүрүмнерин сагыыр дээрзин Өрт-камгалалыныӊ 11 дугаарлыг кезээниӊ инспектору чугаалаан. Июнь 21-ге чедир республиканыӊ девискээринде өртке удур онза чурумну чарлаан. Арга-арыг кирери, одаг кыпсыры, бок өрттедири хоруглуг дээрзин дыӊнаткан.
Бии-Хем кожууннуӊ кадык камгалалынга, кем-херектер профилактиказынга, чааагайжыдылгага хамааржыр шупту айтырыгларны сайгарып чугаалашкан. Чонну дүвүредип турар берге болгаш чугула айтырыгларны харыысалгалыг ведомстволар хыналдага алган.
Бии-Хем кожууннуӊ чагыргазыныӊ медээзи-биле Р. Демчик белеткээн.