Тывада чурттаар оран-сава өртээ 9 хуу өскен. Россияның өске регионнарынга деңнээрге 3 хуу эвээш дээрзин ТР-ниң тудуг сайыды Аяс Хунай-оол медеглээн. РФ-тиң Тудуг яамызы чуртталга оран-савазының 1 дөрбелчин метрде өртээнге чаа чүүлдерни киирип, бадылаан.
– Россияда чуртталга оран-савазының өртээ ниитизи-биле 12 хуу өзе берген. А Тывада чүгле 9 хуу өскен болгаш 1 дөрбелчин метрде 113 муң 312 рубль болуп турар. Бажың тудар субсидияның болгаш бажың садып алыр дээн хамаатыларга бээр социал төлевирлерниң хемчээлин бадыткаттынган өртекке үндезилеп, федералдыг яамы санап турар. 2022 чылдың кызагдаашкыннарының түңнелинде тудуг материалдарының өртээ ниитизи-биле өзе берген.
Тудуг материалдарының болгаш чурттаар оран-сава өртээнге хамаарыштыр тоомча чок болуп, өртектерни өстүрбес болза, тудуг адырынга багай салдарлыг болуру чугаажок деп, Аяс Хунай-оол санап турар.
– Эрткен каш чылдарда чуртталга бажыңнары туттунмайн турганындан, Тывада чурттаар оран-сава айтырыы черле аар. Бир эвес тудуг адыры туруптар болза, чурттаар оран-сава айтырыы улам нарыыдаар. Ынчан чурттаар оран-саваның 1 дөрбелчин метрде өртээниң бадарын манаан-даа ажыы чок. Ынчангаш бажыңнар өртээн бадырар сорулга-биле, хөй квартиралыг бажыңнарны тудуп эгелээн бис. Садыг-саарылга кылып, чиижең садыглаашкын чорударын болдурбазы чугула. Коммерциялыг тудуг организациялары биле риелторларны хыналдага алыр.
А. ОНДАР белеткээн.
"Шын" №59, 2023 чылдың август 9
