Республиканың Хан кудар станциязы декабрь 5-тен 10-га чедир “Чуртталганы шаңна” деп донорлар акциязын чарлаан. Ону Бүгү-делегейниң Эки турачы чоруктуң хүнүнге уткуштур эрттирип турар.
Өскениң амы-тынын камгалаарынга дуза кадып, бодунуң ханын харамнанмайн дужаап турар энерел сеткилдиг кижилер эвээш эвес. Олар аарып турар, хан хереглээн улуска дыка улуг ачы-дузаны чедирип турар.
Чарлаттынган акцияга киржири кижи бүрүзүнүң бодунуң херээ. Ындыг-даа болза, шынап-ла чугула байдалда хан хереглээн, аарып турар кижиниң амы-тынын камгалап алырынга сээң дужааган ханың канчаар-даа аажок дузалаар дээрзин бодап, кижи бүрүзү киржир болза, хөй кижиниң амы-тынын камгалап ап болур ышкажыл.
Хүннүң-не эки туразы-биле хан дужааган улустуң ханы чүс-чүс кижилерниң амы-тынын камгалап алырынга дузалыг болуп турар. Маңаа маадыр болуру белен – ханыңар дужаагаш, бир-ле кижиниң тынын алганыңар ол!
Хан дужаар мурнунда, паспортун ап алыр. Баш бурунгаар дараазында чүүлдерже кичээнгей салып, белеткенир:
● Даң бажында чиик чемненип алыр, аргалыг болза, чигирзиг шай ижип алыр;
● Үс холуваан далган аймаа, хлеб, мүн болгаш ногаа, чимис аймаан чиир;
● Хан дужаар мурнунда, быжырган үстүг чемнер, шоколад, тоорук болгаш финиктер, авокадо, свекла, банан чивес;
● Хан дужаар бетинде 48 шак дургузунда арага аймаа, 72 шак дургузунда аспирин, анальгин холумактыг эмнер ишпес;
● Хан дужааган соонда, эки дыштаныр, кудумчуже үнеринче далашпас.
Хан дужаар күзелдиг чонну дараазында адресте манап турар:
Кызыл хоорай, Чүлдүм кудумчузунда 1 дугаар бажың.
Ажылдаар шактары:
Пн-чт: 8.00 – 12.00 ш. 14.00 – 16.00 ш.
Пт: 8:00 – 11:00 ш.
Сб: 8.00 – 12.00 ш. 14.00 – 16.00 ш.
/ ТР-ниң Кадык камгалал яамызының медээзи-биле
С. МОНГУШ белеткээн.