Тывада бензин өртээниң улгатканын Ачинск хоорайда нефть болбаазырадып, солярка, бензин дээш өске-даа кывар- чаар материалдар бүдүрүп турар заводтуң бо чылгы ээлчеглиг септелгези-биле холбаштырып турар. Бо заводтуң чылдың-на план ёзугаар септелгези-биле бензин өртээниң улгатканын тайылбырлаары чаңчыл апарган. Кывар-чаар чүүлдер рыногунда ажылдап турар специалистерниң санап турары-биле алырга, чүгле чаңгыс заводтуң септелгези кывар-чаар чүүлдерниң өртээниң өзеринге кол чылдагаан болбас ужурлуг.
2023 чылда планныг септелге чорударын, кывар- чаар материалдар садарын эвээжедирин Ачинскиде завод апрель айда-ла садып алыкчыларга баш бурунгаар дыңнаткан турган. А сентябрь 5–11 хүннерде кывар-чаар чүүлдер садарын соксаткан.
Тыва Республиканың одаар чүүл болгаш энергетика сайыды Эдуард Куулар бо заводтан кывар-чаар чүүлдерни дорт садып алыры соксаан-даа болза, Красноярск край болгаш Хакас Республикада улуг нефть баазаларындан Тыва кывар- чаар чүүлдерни садып болур, ынчангаш бензин, солярка дээш өске-даа чүүлдер-биле хандырылга үзүктелбес дээрзин дыңнаткан.
Хөй хемчээлдиг бензин, солярка дээш өске-даа кывар-чаар материалдар шыгжаар улуг баазаны республикага тургузар дугайында айтырыгны Тываның Баштыңы Владислав Ховалыг ийи чыл бурунгаар көдүрген. Бир эвес ындыг шыгжамыр черин тудуптар чүве болза, берти дизе, часкы болгаш күскү хову ажылдарының, мал чеминиң белеткелиниң үезинде көдээниң ажыл-ишчилеринге бензин, солярканы чүгээр өртектер-биле садып, оларга деткимчени көргүзүптер арга тыптып кээп болур.
Тываның Баштыңы Владислав Ховалыгның көдүргени бо айтырыгны херек кырында боттандырар талазы-биле хемчеглерни сайгарып көөр даалганы ТР-ниң Чазааның Даргазының оралакчызының албан-хүлээлгезин күүседип турар Олег Лукин ТР-ниң одаар чүүл болгаш энергетика сайыдынга берген.
Шаңгыр-оол МОҢГУШ.
«Шын» №67 2023 чылдың сентябрь 9