2023 чылдан эгелеп Тывага «Чылдың тудугжузу» деп ат дээш чылдың мөөрейин эрттирери чаңчыл апаар. Республиканың Чазаа ооң дугайында доктаалды хүлээп алган. «Профессионал ажыл-чорудулгазында эки көргүзүглерни чедип алган республиканың инвестиция-тудуг комплекизиниң төлээлерин илередип база шаңнаар талазы-биле комплекстиг хемчеглерни» мөөрейже кииргенин документиде айыткан.
Мөөрейге организациялар болгаш кижилер киржип болур. Октябрьның 5–6 хүннеринде Енисей Сибири корпорацияның адының адаа-биле Тываның найысылалынга эртер тудуг шуулганының үезинде бирги мөөрейни планнаанын тудуг сайыдының оралакчызы Чингис Ховалыг дыңнаткан. Мөөрейниң организакчылары болур ТР-ниң Тудуг яамызы бо удаада 2022 чылдың тулган тудугжуларын илередип, шаңнаар хемчег-биле кызыгаарланырын дыңнаткан.
Оон чоорту номинациялар саны көвүдээр. Өөредилге, культура, чаагайжыдылга адырында эң чедимчелиг төлевилелдерни, чараш дизайнер болгаш архитектура бодалдарының боттанылгазын шаңнаар дугайында саналдар бар. Аныяк тудугжуларны аңгы шаңнаар саналдарны көөр. Ол ышкаш профессионал эксперттерниң эвес, а чурттакчы чоннуң онлайн-бадылаашкыны-биле чемпионнарны илередир “чоннуң” номинацияларын тургузарын чугаалажып турар.
Тудугжу мергежилдиң ат-алдарын бедидип, мурнакчы тудуг арга-дуржулгаларын нептередип, хоорайлар болгаш суурларның хөгжүлдезинче хөй-ниитиниң эң хөй бөлүктерин хаара тудуп, адырның болгаш бүгү экономиканың шак ындыг чугула айтырыгларын мөөрей дузазы-биле шиитпирлеп болур деп организакчылар санап турар.
ТР-ниң Чазааның парлалга албанының медээзинден.
«Шын» №74 2023 чылдың сентябрь 30