Михаил Мишустинге баштаткан Россияның чазак делегациязы-биле кады чырыдыышкын сайыды Сергей Кравцов база Тывага кээп чораан. Ол республиканың өөредилге албан черлерин көрген. Чурттуң өөредилге эргелекчизи улуг чаартылгаларның түңнели болур регионнуң өөредилге адырында капитал септелгелерни үнелеп, башкыларга байыр чедирип, бүгү ортумак профессионал өөредилге системазынга хамаарышкан чугула сан-чурагайлар-биле таныштырган.
Сергей Кравцов Тывага аалдап келгеш, Тываның агроүлетпүр техникумунга доктааган. Сайыт «Аныяктар болгаш уруглар» национал төлевилел ёзугаар 2025–2026 чылдарда чаарттынган объектилерни хынаан. Амгы үеде 560 сургуул өөренип турар өөредилге албан черинде үш оран-саваның: өөредилге корпузунга болгаш ийи ниити чуртталга бажыңынга капитал септелгелерин чоруткан.
Сергей Кравцов 2023 чылдан бээр «Профессионалитет» программазы-биле көдээ ажыл-агый кластеринге бааза болуп келген техникум кадрлар белеткээринге чедимчелиг модельди көргүзүп турарын демдеглээн. Ажылдың аңгы-аңгы хевирлеринге 11 зоналыг өөредилге болгаш бүдүрүлге төвүн мында тургускан, өөредилгени ажыл берикчилери-биле сырый харылзаалыг чорудуп турар. Техникум чурагайлыг чер ажыл-агыйын боттандырарынче болгаш көдээ ажыл-агыйга ужудукчу чок агаар системаларын ажыглаарынче онза кичээнгейни салып турар. Сургуулдар теоретиктиг билиглерин техникумнуң дузалал ажыл-агыйын дамчыштыр быжыглап турар. Техникумда 332 га чер, 112 баш мал бар.
Сергей Кравцов аалдап чорааш, бүгү чуртта ажылчын мергежилдерниң нептереп турарын онзалап айыткан. Инфраструктура чаартылгазының улуг хемчээлдиг программазының дугайында чугаалап тура, ол ажылды Президентиниң айтыышкыны-биле база «Чаңгыс демниг Россия» партияның деткимчези-биле чорудуп турарын сагындырган. «Бо чылын программа-биле 300 хире колледж чаарттынар. Оларның он алдызы септеттинген, ооң иштинде Тыва Республиканың Балгазын суурда» – деп, ол тайылбырлаан. Сайыттың сургакчылаашкыны Кызылдың Д.Б. Ондар аттыг 22 дугаар ортумак школазынга доозулган. Бо школага мурнай Чазак Даргазы Михаил Мишустин база чораан. Аңаа Сергей Кравцов республиканың башкыларынга ведомствонуң шаңналдарын тывыскан. «Россия Федерациязының өөредилгезиниң алдарлыг ажылдакчызы» хүндүлүг атты «Алёнушка» уруглар садының эргелекчизи Елена Мичинмаага тывыскан. «Хүндүлүг дагдыныкчы» хөрек демдээн Тываның Өөредилге яамызының школа килдизиниң эргелекчизи Светлана Монгушка, а «Мергежилинге бердингени дээш» демдекти Тываның көдээ ажыл-агый техникумунуң ажылдакчызы Любовь Денисюкка тывыскан.
Республикада школа өөредилгезиниң чаартылгазы шапкын чоруп турар. Сөөлгү чеди чылда Тывада школа назыны четпээн уруглар өөредилгези 88 хуу турганындан 95 хуу чедир өскен. Үжен бир уруглар сады база он ийи чаа школа туттунган, Чырыдыышкын яамызының деткимчези-биле Тыва 5-7 класстарга «Төрээн черивистиң төөгүзү» деп күрүне эрге-байдалдыг өөредилге номун ажылдап кылгаш, үндүрүп алган.
Медээни болгаш чуруктарны Чазактың парлалга албанындан алган.
Шын №30 2026 чылдың август 5
"Шын" солуннуң МАХ-каналынга каттыжыңар: max.ru/channel_shyn