Час дүжүп, чылып эгелээрге, кижиниң ала-чайгаар бойдусче агаарлап үнүксээзи кээр. Ынчангаш эрткен улуг-хүнде өөм ээзи-биле Дөгээ даанче уйнуктарывысты эдертип алгаш үнүп чордувус. Чаш ажы-төлдүң сонуургап, амырап турарын көөрге, өөрүнчүүн. Моон соңгаар дыштаныр хүннерде хоорайның чараш черлеринче үнүүшкүннерни кылып тураал деп сүмележип турдувус.
Эң-не кол эскерген чүү - лүм — Кызылымның чаарттынып турары. Үргүлчү-ле ажылга хүнзээр болгаш, хоорай иштинде өскерлиишкиннерни, чаартылгаларны-даа таптыг эскербейн чораан болдум. Ылап-ла бедик черже үнгеш, ам кээп эскердим. Хоорайның ол-бо ужу-кыдыында чаа микрорайоннар немежип, кыдыынче калбарып турар-дыр. Ылаңгыя Спутник микрорайонда улуг каът бажыңнар, школа, садиктер немешкен.
Дөгээ даанче үнер бедигээшке чедир чырып турар сайгылгааннарлыг чада база бар. Оон шыпшык бажынче үне бээрге, Будда бурганның тураскаалының чанынга туруп алгаш, хоорайны магадап көөр эптиг черни база ында кылган. Найысылал адыш иштинде дег көстүп турар, чаражын! Бичии школачы чылдарымда бо дагже үнген болгай мен. Оон бээр дыка хөй чүүлдер эки талазынче өскерилген-дир.
Ол хүн Дөгээ даанче үнүп турар кижилер дыка хөй болду, чалыы-кырган дивес. Бедик черже үнерге, кижиниң хей-аъды бедиир дээр-ле болгай, ылап-ла чалгынналы берген ышкаш болдум. Ынчангаш келген дораан өөрүшкүлүг бодалдарымны бижидим.
/ Дина ХОМУШКУ, хоочун библиотека ажылдакчызы.
Буян ООРЖАКТЫҢ тырттырган чуруу.
“Шын” №13 2026 чылдың апрель 9