Тывада мал чеминиң белеткелиниң планы күүсеттинериниң кырында келген. Республиканың Көдээ ажыл-агый яамызының сөөлгү медээлери ёзугаар алырга, 233,9 муң тонна сиген аймаан мал чеми кылдыр белеткээн.
Ол дээрге планның 95 хуузу. Таңды, Тере-Хөл, Каа-Хем болгаш Сүт-Хөл кожууннар мал чеми белеткээр планын ажыр күүседипкеннер. Өвүр биле Барыын-Хемчик кожууннарның сигенчилери планын 100 хууга күүсеткен. Дараазында кожууннар планын күүседириниң кырында келген: Чаа-Хөл (88,5 хуу), Тожу (84 хуу), Чөөн-Хемчик (89,9 хуу), Кызыл (91,8 хуу), Бай-Тайга (81 хуу), Чеди-Хөл (85,4 хуу).
2023 чылда Тывага оът-сигенниң дүжүткүрү багай эвес болган, 1 гадан ортумаа-биле 13 центнер болганы мал чеминиң планнаттынган хемчээлин белеткеп алыр арганы берген. Көдээниң ажыл-ишчилери планның күүсеттингенинге оожургавайн, сиген-ширбиилди артыкшылдыг кылдыр белеткеп алыр дээш, мал чеминиң белеткелин уламчылап турарлар. Мал чеминиң белеткелиниң шалыпчы айының хуусаазын октябрь айга чедир узаткан. Эң хөй мал чемин белеткеп алган кожуунга шаңнал – сигенни кезеринге болгаш ажаарынга херек, бүрүнү-биле чыгдынган кожуг дериг-херексели.
Көдээде база бир чугула ажыл, тараа, картофель болгаш ногаа аймааның дүжүдүнүң ажаалдазы эгелээн. 985 га черде тараа дүжүдүн ажаап алыр ужурлуг. Сөөлгү хүннерге чедир 3115 тонна картофельди, 348 тонна ногаа аймаан ажаап алган.
Ш. Моңгуш.
“Шын” №71 2023 чылдың сентябрь 20