Тываның тараачын-фермерлериниң шөлдеринде 2026 чылда, эрткен 2025 чылдыынга деңнээрге, тараа аймааның дүжүдү элээн бедик. Чамдык фермерлерниң, чижээлээрге, Таңды кожуунда Александр Боровиков, Михаил Санников оларның шөлдеринде тарааның үнгени дыка эки. Бир гадан ортумаа-биле 18-25 центнер дүжүттү ап болур деп тараажылар санап турар.
Тываның Көдээ ажыл-агый яамызының сентябрь айның баштайгы хүннеринде медээлери-биле алырга, республиканың тараажылары 3510,9 тонна тараа аймааның дүжүдүн ажаап алганнар. Чижээлээрге, Чеди-Хөл кожуунда тараажы Эчис Хуурак 20 га шөлүнден 45 тонна суланы август айның сөөлгү хүннеринге чедир ажаап алган. Тараажы дүжүт ажаалдазын уламчылап турар.
Ногаа аймааның дүжүдү база бо күзүн багай эвес болган. Чөөн-Хемчик кожууннуң хууда болгаш фермер ажыл-агыйлары август айның төнчүзүнге чедир 350 тонна хире картофельди, 230 тонна ажыг ногаа аймаан ажаап алган. Республикада дүжүт ажаалдазы уламчылавышаан. Көдээниң ажыл-ишчилери 3,8 муң га тараа, 12,8 муң га сиген, 2,5 муң га ногаа болгаш картофель шөлдеринде үнген дүжүттү бүрүнү-биле ажаап алыр дээш, бо хүннерде кызымаккай ажылдап турар.
Дүжүттүң бедик болганы эрткен чайын чүгле агаар-бойдустуң таарымчалыындан эвес, Барыын-Хемчик, Улуг-Хем, Таңды, Каа-Хем, Чаа-Хөл, Бии-Хем кожууннарда суггарылга системаларын чаартып, оларның ажыглалын калбартканындан, чаашкынналдырып суггарар дериг-херекселди садып алырынга тараачын-фермерлерге республиканың бюджединден акша-хөреңги деткимчезин Тываның Чазаа чедиргени база кончуг дузалыг болган.
Дүжүт ажаалдазының үезинде көдээде коллективтиг болгаш хууда бүдүрүлгелерни кывар-чаар материалдар-биле хандырар талазы-биле республиканың удуртулгазының ап чоруткан хемчеглери база улуг деткимче болган. Кывар-чаар чүүлдерни регионнуң көдээ бүдүрүлгелеринге көвүдеди үндүрүп бээр дугуржулга "Роснефть" биле ТР-ниң Чазааның аразында чедип алдынган.
Ш. Моңгуш.
“Шын” №35 2026 чылдың сентябрь 10
"Шын" солуннуң МАХ-каналынга каттыжыңар: max.ru/channel_shyn