Тускай шериг операциязыныӊ айтырыгларыныӊ талазы-биле Тыва Республиканыӊ Баштыӊыныӊ тускай төлээзи Тимур Куулар Луганск Улус Республикага база Запорожье областка сургакчылап чораан. Чөөн шериг округунуӊ командылалы болгаш бистиӊ республикадан ук округтуӊ аӊгы-аӊгы кезектеринде шериг албанын эрттирип турар оолдар-биле ужурашкан.
Тываныӊ Баштыӊы Владислав Ховалыгныӊ даалгазы болгаш Кутузов Орденниг 127-ги мото-адыгжы (даг) дивизиязыныӊ командылалыныӊ дилээ ёзугаар тускай операция үезинде эӊ-не шылгараан дайынчыларга күрүне шаӊналдарын тывыскан.
Тускай шериг операциязыныӊ киржикчилерин деткээн чаӊгыс чер чурттугларыныӊ чыгган акшазы-биле саткан техниктиг херекселдерни оларга база дамчыдып берген.
Тимур Куулар өске регионнарныӊ ачы-дузазы-биле Луганск Улус Республикада катап септеп кылып турар социал инфраструктура объектилеринде ажылдарны сайгарып чугаалашкан хуралга киришкен. РФ-тиӊ тудуг яамызыныӊ оралакчы сайыды Валерий Леонов хуралды удуртуп эрттирген.
ЛУР-нуӊ Свердловск районнуӊ Свердловск хоорайы Тыва Республика шефтээшкинге алган. Амгы үеде 6 дугаар школаныӊ спорт залын септээринге дузалажып турар.
Чугула херек шупту материалдарны садып алган, тудугжулар объектиде график ёзугаар ажылдап турар. Өөредилге чылыныӊ эгезинге чедир шупту ажылдарны доозар сорулганы хуралдыӊ киржикчилери – шефчи регионнарныӊ төлээлериниӊ мурнунга тургускан.
Туттурган шериг Сайын Иргиттиӊ ачазынга өг-бүлениӊ байдалыныӊ аайы-биле шөлээлеп алырынга дузалажыр дээш, Тимур Куулар ЛУР-га барып чораан. Кара-Кос Иргитти шериг мөӊнээшкининче келдирген. Ол оглу-биле деӊге ЛУР-нуӊ девискээринде тускай шериг операциязыныӊ даалгаларын күүседип келген, адазы чүгле өске шериг кезээнде турар. Шөлээ дугайында айтырыг эки шиитпирлеттинген.
ТР-ниӊ шефтеп дузалажыр регионундан аӊгыда, Запорожье обласка база Тимур Куулар барып чораан. Чөөн шериг округунуӊ шериглериниӊ командылакчызыныӊ оралакчызы генерал-майор Роман Греков-биле чугула ужуражылга болган. Солчуп алыр ужурлуг туттурган шериглерниӊ даӊзызынче Сайын Иргитти киирер талазы-биле хемчегни шериг округунуӊ удуртулгазы уламчылап турар.
Чөөн шериг округунуӊ командылалыныӊ чөпшээрээни-биле шериг кезектеринге барып четкеш, бистиӊ шылгараан дайынчыларывыска Тыва Республиканыӊ күрүне шаӊналдарын тывыскан. 21005, 55115, 10103 шериг кезектериниӊ командирлери-биле дугурушкаш, тускай шериг операциязыныӊ девискээринге Камчаткадан чедип келген далай шериглеринге, тыва оолдарга, ужурашкан. Ол шериг кезектеринге техниктиг херекселдерни дамчыдып берген.
– Бистиӊ чаӊгыс чер чурттугларывыс шериг албанын төлептии-биле эрттирип турарлар. Оолдарныӊ дайынчы соруу бедик. Кандыг-даа дайынчы даалганы күүседиринге белен. Тиилелгеге болгаш оларны чоок кижилери манап турар дээрзинге бүзүрел- диг – деп, тускай төлээ Тимур Куулар дыӊнаткан.
/ ТР-ниӊ Чазааныӊ
медээлеринден
Р. ДЕМЧИК белеткээн.