Декабрь 18-те Чаа чылдың белектерин чүък машиназы-биле чорударын республиканың каттышкан штавы планнап турган. Амгы үеде чыгдынган чүъктү өске арга-биле чорударын өөренип көрүп турар.
Кызыл хоорайның Кочетов кудумчузунда 155 дугаарлыг бажыңда, тускай шериг хөделиишкиннериниң киржикчилеринге болгаш оларның өг-бүлелеринге ачы-дуза чедирер штабта “Дайынчыларга Чаа чылдың белектериниң” чыылдазы уламчылап турар.
Бии-Хем кожууннуң сагыш човангыр чурттакчы чону дайынчы тыва оолдарывыска шээр болгаш бода малдың доңурган эъдин кожуунунуң өмүнээзинден белек кылдыр эккелген.
Ол ышкаш Эйлиг-Хем сумузунуң улуг-биче чону быжырган далган-боорзактарны болгаш доңурган манчыларны штабче чорудуп турарлар.
Тес-Хем кожууннуң Чыргаланды сумузунуң ажыл-ишчи арат-чону чылыг чеңи-чоктарны демнии-биле даарааш, белек кылдыр чоруткан.
Бай-Тайганың чурттакчыларының өмүнээзинден кожуун чагырыкчызының оралакчызы Айдың Бартан 3 шоодай хой кештерин штабка дамчыткан.
Дайынчы оолдарга Чаа чылдың белектерин дараазында адреске чедирип болур: Кызыл хоорай, Кочетов кудумчузу, 155 дугаарлыг бажың, 26 дугаар өрээл, харылзажыр тел.: (тел. 2-17-44), (тел. 2-10-50).
Алиса ДОНГАК.
