Моолга август 18-20 хүннеринде “Көшкүн чон” деп делегей культуразының фестивалы болуп эрткен.
Улан-Батор хоорайдан 40 километр черде турар "Тайдж Хайрхан" деп шынаага делегейниң көшкүн чоннарын чыгган улуг фестивальга Кыдат, Венгрия, Казахстан, Кыргызстан, Көрей Республикадан делегациялар болгаш 1,1 муңдан ажыг киржикчи Россиядан – Бурятия, Хакасия, Саха Республикадан болгаш Тывадан делегациялар боттарының үндезин культуразын таныштырып бараалгатканнар.
Тыва Республиканың мурнундан Тыва культура төвүнүң ажылдакчылары болгаш “Тыва” хөгжүмнүг аас чогаал бөлүү киржип четкен.
Делегейниң чоннарын мөөңнээн фестивальдың кол-ла сорулгазы байлак төөгүлүг, кайгамчыктыг чедиишкиннерлиг көшкүн амыдыралдыг чоннарның культурлуг өнчүзүнүң үнелелин бедидери, Моолдуң культуразы, көшкүн амыдыралын, ёзу-чаңчылдарын чыылганнарга таныштырары болуп турар.
Болган фестивальга ЮНЕСКО болгаш өске-даа делегей чергелиг улуг организацияларның төлээлери база чалаттырып, ооң хүндүлүг аалчылары болуп киришкен.
Шак мындыг улуг хемчээлдиг фестивальды организастаар бертинде Моол күрүне 34 даштыкы күрүнелерге виза чок киреринге чөпшээрелди берген. Ооң утказы, 1 сая даштыкы туристерден 1,2 млрд долларны 2023 чылдың төнчүзүнге чедир ажылдап алыры- база бир кол сорулгаларның бирээзи.
Моолдуң Туризм болгаш долгандыр бойдус хүрээлеңин хайгаараар яамызының медээзи-биле, 2023, 2024, 2025 чылдарны “Моолду кээп көөр чылдар” кылдыр чарлаан.
К.Монгуш.
Чуруктарны интернеттен алган.
