Красноярскыга январь 23–26 хүннеринде И.Ярыгин аттыг спорт ордузунга эрткен 36 дугаар делегей чергелиг Гран-приниң Кубогу дээш хостуг база херээжен хүрештер маргылдааларынга 17 аңгы чурттардан 400 ажыг мөгелер киришкен. Маргылдааның кол сорулгазы — Европа чемпионадынга киржир мөгелерни шилип алыры.
Тыва Республиканың алдарлыг тренери Айдаш Самданның дыңнадыы-биле алырга, бистиң мөгелеривистен 57 килге Начын Моңгуш шыырак дээн дагестан мөгелерни чииги-биле ойнап тиилээн. Түңнел хүрешке Россияның 2024 чылда чемпиону якут мөге Лев Павловту бүзүрелдии-биле 7:5 санга ойнааш, Европа чемпионадынга киржир эргени чаалап алган. Ол ышкаш 97 килдиг мөгелер аразынга дидим хүрешти Бады-Маадыр Самдан көргүзүп, 2 дугаар шаңналдыг черни алган. Начын Монгуш биле Бады-Маадыр Самданны белеткээн тренерлер Алибек Хомушку, Владимир Тюлюш, Александр Чадамба — шупту Олимпий курлавырларының спорт школазының башкылары. 65 килге Чаян Монгуш (тренери А.А. Самдан) туруштуун көргүзүп, 3-кү черге төлептиг болган.
А.ЧАМБАЛ-ООЛ.
“Шын” №3 2024 чылдың январь 30



