Тывада Статегтиг инициативалар агентилелиниӊ эксперттери ажылдап турар.
Инвестиция климады болгаш амыдырал шынарыныӊ национал рейтингизинде регионнуӊ көргүзүглерин эдип чазаар талазы-биле ведомстволарга методиктиг дуза чедирериниӊ дугайында Тываныӊ Баштыӊы Владислав Ховалыг Статегтиг инициативалар агентилелиниӊ чиӊгине директору Светлана Чупшева-биле дугуржуп алган.
Эксперттер регионалдыг яамыларныӊ төлээлери-биле кезек ужуражылгаларны эрттиргеш, Тыва Республиканыӊ Чазааныӊ Чөвүлел хуралынга киришкен.
Эчис сорулгалыг ажылдарны сессияларга чугаалашкан түӊнелинде, регионнуӊ национал рейтингизинде туружун экижидеринге дузалаар ужурлуг хемчеглерниӊ планыныӊ ора-сомазын Статегтиг инициативалар агентилели-биле кады тургузар.
«Регионнарныӊ хөгжүлдези болгаш инвестициялар» деп адырда «Мурнады шиитпирлээр регионалдыг төлевилелдер» деп практиканыӊ директору Индира Киреева, Чөвүлел хуралыныӊ мурнунда, ийи хүн дургузунда эрге-чагырга органнарыныӊ специалистери-биле кады ажылдап турган. Республиканыӊ үстүнде айыткан ийи рейтингиде көргүзүглерин экижидер хемчеглер талазы-биле байдалды сайгарып чугаалашканнар.
Республиканыӊ рейтингизин экижидип болур хемчеглерни хүлээп, кылыр ажылдарныӊ даӊзызын тургузарынга регионда шупту эрге-чагырга органнарыныӊ комплекстиг болгаш системалыг ажылдаары негеттинип келген дээрзин Индира Киреева Чөвүлел хуралынга демдеглээн.
— Ужуражып чугаалашканывыс эрге-чагырга органнарыныӊ шупту төлээлериниӊ ажылдаксап турар күзелин көрдүвүс. Ынчангаш көргүзүглерни экижидер талазы-биле аргалары бар деп бодаар мен – деп, И. Киреева түӊнеп чугаалаан.
Тыва инвестициялыг климат рейтингизинде 64 дугаар черни ээлеп турар. Эге дээрезинде административтиг шаптык-моондактарны эвээжедириниӊ талазы-биле кол кылыр ужурлуг хемчеглерни эксперттер сүмелээн. Ол дээрге инвестиция порталын ажыглалалга киирери, документилер долдурарын болгаш эрге-чагырга органнарыныӊ аразында кады ажылдажылганы чурагайжыдары болур. Тудуг ажылынга дузалажыр төптү тургузар арганы база сүмелеп турар.
– Чедип келген экспертер-биле элээн каш бөлүк-бөлүк угланыышкыннарны ажылдап кылдывыс. Статегтиг инициативалар агентилелинде коллегалар-биле кады ажылдажылганыӊ дүрүмнерин сайгарыштывыс. Бо чылдыӊ төнчүзүнде ук Агентилелдиӊ баазазынга бистиӊ ажылывысты түӊнеп, частырыгларывысты эдип чазаары-биле стратегтиг сессияларны эрттирерин саналдаан бис – деп, экономиктиг хөгжүлде болгаш үлептүр сайыды Айдыс Сат чугаалаан.
Тыва Республиканыӊ Чазааныӊ медээлеринден Р. Демчик белеткээн.