Москва хоорайда Тыва Республиканың Бүрүн эргелиг төлээ чери болгаш «Изида» деп шажынчы ачы-буян фондузунуң аразында дугуржулгага ат салдынган. Ук документ тускай шериг операциязының киржикчилерин болгаш дузага хереглелдиг республиканың өске-даа хамаатыларын деткиириниң иштинге ийи таланың кады ажылдажылгазын көрүп турар.
Чижээлээрге, дугуржулганың иштинге тускай шериг операциязының киржикчилеринге болгаш дузага хереглелдиг Тываның өске-даа хамаатыларынга Москва хоорайга түр турар үезинде дазылгага (хостелге) халас чурттадырын көрген.
Москва хоорайда Тыва Республиканың Бүрүн эргелиг төлээ чериниң тодаратканы-биле алырга, ТШО-да шериглерниң өг-бүлелери, дөргүл-төрели, волонтерлар, эмчи үлүү-биле Москва хоорайның болгаш Москва областың эмнелге черлеринде шинчилге эртип, сүме ап, эмнелгеге чыдар дээш чедип келген республиканың өске-даа төлээлери, 16 хардан өрү назылыг школачылар, абитуриентилер, студентилер, аспирантылар болгаш спортчулар дазылганың ачы-дузазын алырлар.
Дазылгага чурттадырының дугайында айтырыгларны Тыва Республиканың хамаатылары info@pprt17.ru электроннуг шуудаң таварыштыр азы (499) 236-48-01 дугаарлыг телефон дамчыштыр киирип болур.
“Шын” №94 2023 чылдың декабрь 9