Тыва Республиканың Чазааның Даргазының оралакчызы – Тыва Республиканың Москвада төлээзиниң албан-хүлээлгезин күүседип турар Чечен Чоксум Россия Федерациязының сан-чурагайлыг хөгжүлде, харылзаа болгаш массалыг коммуникациялар сайыдының оралакчызы Дмитрий Ким база Инфраструктураларлыг төлевилелдер боттандырар департаментиниң директору Дмитрий Угнивенко олар-биле ужурашкан.
Республикада чедери берге үш суурга волокно-оптиктиг харылзаа шугумнарын шөйүп чедирериниң аргаларының дугайында ужуражыышкын үезинде сайгарып чугаалашкан. Тере-Хөл кожууннуң Кунгуртуг, Мөңгүн-Тайга кожууннуң Кызыл-Хая, Бай-Тайга кожууннуң Кара-Хөл суурларга “Интернет” четкизи амгы үеде коштунмаан, ол черлерниң чурттакчылары интернет ачы-дузазын ажыглаар аргазы чок.
Бо суурларны “Интернет” четкизинге кожар төлевилелди долузу-биле деткиирин, федералдыг акша-хөреңги-биле ону боттандырарынга деткимчени бээринге беленин Дмитрий Ким илереткеш, республиканың харылзаа специалистери-биле кады волокно-оптиктиг харылзаа шугумнарын тударының төлевилелдерин ханы сайгарып көөр даалганы Инфраструктураларлыг төлевилелдер боттандырар департаментиниң директору Дмитрий Угнивенкога берген.
Кунгуртуг, Кызыл-Хая, Кара-Хөл суурларже тудуп чорудар волокно-оптиктиг харылзаа шугумнарның төлевилелдериниң концепциязын Тыва Республиканың Сан-чурагайлыг хөгжүлде яамызы чоокку үеде белеткеп кылыр ужурлуг. Концепцияның эргежок чугула айтырыгларын ажылдап кылган соонда, ону боттандырары-биле Россия Федерациязының сан-чурагайлыг хөгжүлде, харылзаа болгаш массалыг коммуникациялар сайыды Максут Шадаевке таныштырар.
Ш. СУВАН
“Шын” №72 2023 чылдың сентябрь 23