Делегейде дески чүве чок, кудай дээрни-даа көөрге, бүргеп, аязып, хадып, чаап турар. Топтуг-томаанныг, улуг угаан-медерелдиг, амыдырал дээш хүн бүрүде туржуп, ажылга шыдамыккай, кежээ, чонунга дузааргак кижилерни хөйү-биле эскерип, көрүп чоруур бис. Украинада болуп турар тускайлаттынган шериг операциязында киржип турар дайынчыларга дериг-херекселдерни, чылыг идик-хепти, аъш-чемни берип турар буянныг кижилер ол-дур. Дүн-хүн дивейн кижилерниң кадыкшылы дээш демисежип чоруур эмчилер, корум-чурум камгалалын тудуп чоруур эрге-хоойлу ажылдакчылары дээш кымнарны чок дээр. Езулуг медерелдиг кижилер ол-дур!
Мунар аът-даа болза, аажызы багай, чоржаң, ылгын, челер дээш аңгы-аңгы. Кижилер аразында шын-меге чугаа тарадып чоруурларны чок деп болбас. Дидир-дидир, хоп-чип тарадып чоруур кижилерни дораан-на эскерип болур. Бөлүк кижилер чугаалажы берген болза, аажок-ла кулак салып дыңнап, «Дыңнавайн бардым» – дээш, катап-катап айтыргылаар. «Ол кижи сени аажок-ла бактап олурду», «Чуртка аш-чут эгелээр», «Таныыр даргазынга хээли берип тургаш, ажылче кирип алган» – дээш, кандыг-даа хоп чугааларны ындыг кижилер тарадып чоруур.
Дидир-дидир хоп чугааларны дыка-ла хоралыг деп бодаар мен. Олар чурттар аразынга дыка багай, халдавырлыг аарыглар тыптып турар вирустарга дөмей. Шаандагы үеде хоп чугаа кожа өглер аразынга чоорту тарап турган болза, амгы үениң электроннуг дериг-херекселдер дузазы-биле каш-ла минута дургузунда дыргын тарай бээр. Хоралыг дидир-дидир чугаа тарадып чоруур кижилер медерел кирип, соксаарын дыка-ла күзээр мен.
Дамдынчап ХОВАЛЫГ.
Кызыл хоорай.
«Шын» №31 2024 чылдың апрель 24