Май 22-де “Убса-нур ыйгылаажы” камгалалдыг черниң эртем ажылдакчылары Тываның Гастелло аттыг национал парыгының специалистеринге дииңнерни канчаар хайгаараарын өөреткен.
Өске чылдарда Кызылдың парыгынга дииңнер хөй турганын чурттакчылар билир. Эрткен каш чылдарда хенертен ол дииңнер көзүлбейн барган үеде Казань, Барнаулдан дииңнерни Кызылга эккелгеш, Национал парктың доктаамал чурттакчылары кылдыр салыр дуржулганы ажыглап эгелээн.
Оларның чаа черге тааржып, турумчуп чурттаарынга эптиг байдалдарны тургузары-биле, паркта дииңнерге коңгулдарны кылып, бажыңчыгаштар, чем каап бээр черлерни ында-мында ыяштарда аскылаан.
Дииңнерниң долгандыр турар девискээриниң бойдузунга бодун канчаар алдынып турарын доктаамал хайгаараары-биле “Убса-нур ыйгылаажы” камгалалдыг черниң эртемденнери фотоловушкаларны парктың ажылдакчыларынга дамчыдып бергеш, чаа техника-биле канчаар ажылдаарын айтып берип, кыска өөредилгени эрттирген. Ол фотоловушкаларның тырттырган видео азы чуруктарындан дииңнерниң оюну, чемни кайыын тып чип турары, коңгулун белеткеп турарындан эгелээш, парктың өске-даа чурттакчыларының амыдыралының дугайында солун чүүлдерни билип ап болур.
Ол бүгү тырттырттынган чүүлдер дугайында удавас делгелге кылырын парктың ажылдакчылары планнап турар.
Бистиң корр.
ТР-ниң Культура яамызының медээзи-биле.