Бо чылын диспансеризацияны 1984, 1987, 1990, 1993, 1996, 1999, 2002, 2005 чылдарда төрүттүнген хамаатылар болгаш 40 хардан өрү назылыг улус шупту хамааржыр (Кадык камгалал яамызының 2019 чылдың май 6-да үндүрген дужаалы ёзугаар). Диспансеризацияны 18-тен 39 харга чедир 3 чылда чаңгыс катап, 40 хардан өрү назылыглар чылдың-на эртерин чаа дүрүмде айтып каан.
Диспансеризация ийи чадалыг. Бирги чадазында ниити организмниң бүгү байдалдарын хынаар. Ынаар кижиниң деңзизи, дурт-сынының, хан базыышкынының хемчээли, чүрек-дамыр органнарының байдалы дээш албан эртер ужурлуг эмчилерниң даңзызы шупту 15 чүүлден тургустунган. Бирги чадазын эрткен соонда, бир эвес кадыының байдалы эки, хоочураан аарыглар илереттинмээн болза, диспансеризацияның ийиги чадазын эртпес.
Диспансеризацияның бирги чадазында кижиниң кадыында бир-ле хоочураан аарыг илереттинип турар каразыг бар болза, терапевтиң үндүрген түңнели-биле ийиги чаданы албан эртер.
Ийиги чадазында аарыг кижиге немелде эмчиниң шинчилгезин чорудар. Түңнелинде, терапевт эмчи диагносту тургузар болгаш аарыг кижиниң кадыының кайы бөлүкке хамааржырын тодарадыр. Бир эвес аарыг кижиге ам-даа немей ханы эмчи шинчилгези негеттинип турар болза, чогуур эмчилерже угланыышкынныг бижикти бээр. Ол ышкаш амгы үениң дээди технологиялыг эмчи дузазын алырынче болгаш санатор-курорттуг эмнээшкин алырынга чугула бижикти терапевт эмчи бижип бээр.
Бистиң корр.
«Шын» №75 2023 чылдың октябрь 4