Чаа өөредилге чылы-биле деңге аргыжылга дугайында чидиг айтырыг ам база катап тургустунуп келген. Интернет четкизинге социал четкилерге Вавилин ээтпээнче уруглар өөренген соонда чүге чанып чадап турарыл дээн дүвүрээзинниг бижиктер үнүп эгелээн. Төптен ырак черде чурттап турар өг-бүлелерге аргыжылга айтырыы нарын болуп артпышаан. «Умный транспорт» деп аргыжарынга эптиг капсырылга-даа бар, автобустар-даа удаа-дараа халып турарын эскерер бис. Чамдык чурттакчы чоннуң чугаазы-биле алырга, транспорт чок болганындан школачылар кичээлдер соонда чанып чадааш, доктаамнарга үр манаар ужурга таваржып турар.
Кызыл хоорайның чагырга чериниң ажылдакчыларының сүмелээни-биле «Автоколонна 17» КХН-ниң ажылдакчылары-биле корреспондентилер ужурашкан.
«Автоколонна 17» КХН-ниң кол диспетчери Александра Соян:
– Автобустар ажыл хүнүнде аразы 15 минута кылдыр хүнзедир алды автобус ажылдап хүнзээр. Чижээлээрге, эртенги болгаш кежээки шактарда пассажирлер хөй аргыжып турар үеде аразы 15 минуталап халдыр. А хүндүс аргыжар чон эвээште харын 20 минута аралыг кылдыр халыыр. Бистиң организацияның чолаачылар-даа, кондукторлары-даа школачыларга кичээнгейлиг. Доктаамда бичии уруглар турар болза, автобус долу-даа болза, кызып сыңырып алырын оралдажырлар. Дежурный диспетчерлер автобустарның үезин сагыырын үргүлчү хынап турар.
Школачыларның медеглээни-биле алырга, олар чанар автобузун 20–25 минутаның дургузунда доктаамга манаар ужурга таваржып турар. Чамдыкта душ болуп дыка дүрген чедип-даа келир. Өөреникчилер хүннүң-не элээн хөй үени орукка чарыгдап турар. Кызыл хоорайның 8 дугаар школазының өөреникчилери, Вавилин ээтпээниң бичии чурттакчылары кичээлдер соонда чанар дээш автобус доктаамынга чедир элээн ырак черге чадаг кылаштап келгеш, автобузун база 20–30 минута дургузунда манаар. Кызылдың коммуналдыг көвүрүүн кеже бээрге, Вавилин ээтпээнче баар доктаамга чүгле школачылар эвес, а улуг улус база чанар автобузун элээн үр манаар. Төптен келген автобустар долу, турбайн халдып эрте бээрин пассажирлер демдеглээн.
«Автоколонна 17» КХН-ниң медеглээни-биле алырга, диспетчерлерже хомудалдар кирбээн. Бир эвес автобусту үр манаар ужурга таварышса, 89133405040 телефон дугаарынче долгаарын азы «Умный транспорт» капсырылгазын смартфонунче киирип алырын диспетчер сүмелээн.
Чылыг үеде уруглар дараазында автобусту манап алыр. А кышкы үеде школачылар канчаарыл деп айтырыг бар.
А.ОНДАР.
"Шын" №70 2023 чылдың сентябрь 16
