Июль 27-де Россияның бүгү субъектилери-биле деңге Кызыл хоорайга Донбасстың дайындан когараан чаштарынга Сактыышкын хүнүнге тураскааткан акция болуп эрткен.
Шак ол хүннү ынчаар шилээни анаа эвес. 2014 чылда Горловкаже боолаашкын үезинде тос айлыг уруглуг Кристина Жук аңаа чок болган. Аваның чаш төлүн куспактап алган чуруу бүдүн делегейге тарап, ону “Горловканың Мадонназы” деп адай берген. Ол хүн 22 тайбың чурттакчылар, оларның аразында дөрт чаштар чок болганы-биле төөгүже “Донецкиниң ханныг улуг-хүнү” кылдыр кирген. 2014 чылда шериг агрессияның түңнелинде 300 ажыг чаштар амы-тынындан чарылганын акция үезинде дыңнаткан.
2022 чылда Донецк Улус Республиканың Баштыңы Денис Пушлинниң Чарлыы-биле ол хүннү Дайындан когараан чаштарга сактыышкын хүнү кылдыр тургускан.
Ниити Россияга эрткен акцияга Тыва катчып, Кызылда “ТШО маадырлары” тураскаал комплекизиниң чанынга кажыыдалдың минутазын чарлап, чечек салыр ёзулалды эрттирген. Сактыышкын хүнүнге тураскааткан митинг үезинде каргыштыг хүнде дайын уржуундан чок болган хилинчек чок чаштарның шуптузунуң аттарын чонга ыыткыр адап турда, чыылганнар аразында акцияның бичии киржикчилери чымчак ойнаарактар болгаш чечектерни салган.
ТР-ниң Чазак Даргазының оралакчызы Артына Бузур-оол бо акция-реквиемни Тывада ийи дугаар чыл эрттирип турарын чугаалаан. Ону Тывада ТШО хоочуннарының ассоциациязының чөвүлели биле республиканың Ада-чурт камгалакчыларының өг-бүлелериниң комитеди демнежип организастап турар.
«Өзүп олурар салгалдар ол болуушкуннар дугайында билип, дайын уржуундан чок болган чаштарны утпайн, оларга чылыг сактыышкыннарны кылып чоруурунга шак мындыг акцияны эрттирери чугула” — деп, ол демдеглээн.
Ада-чурт камгалакчыларының өг-бүлелериниң регионалдыг штавының удуртукчузу Лада Натпит эрткен чылын ачы-дуза чедирилгезин кылыр үүле-херээ-биле Донецк хоорайга чедип чорааш, Ангелдер аллеязынга барып чораан.
“Ында, хоорайның төвүнде улуг аллея бар. Аңаа чечектер салыр дээш, улус хүннүң-не үзүлбес. Акцияның эң-не кол кезээ – чок болган чаштарның шуптузунуң аттарын адап турары болур. Чүге дээрге кайы хире коргунчуг байдалга ол хилинчек чок чаштарның таварышканын шупту билзин дээш” – деп, ол чугаалаан.
Болган акцияга Тываның эрге-чагырга органнарының төлээлери болгаш бичии чаштар, элээдилер база киришкен.
/ Бистиң корр.
Буян ООРЖАКТЫҢ тырттырган чуруктары.
“Шын” №29 2026 чылдың июль 30
"Шын" солуннуң МАХ-каналынга каттыжыңар: max.ru/channel_shyn