Эрткен дыштаныр хүннерде соцчеткилерге Бии-Хем кожууннуң Өг-бүлеге болгаш уругларга дуза чедирер төптүң кижизиттирикчилери бичиилерин дорамчылып турарын көргүскен видео тарай берген.
Аңаа хамаарыштыр республиканың ИХЯ ажылдакчылары хыналда хемчеглерин чоруткан. Полицияның 7 дугаар пунктузунуң (Туран хоорай) назы четпээннер талазы-биле инспектору назы четпээннер болгаш төптүң кижизидикчи башкызы-биле ажыт-чажыт чок чугааның түңнелинде, бичии уругларга хамаарыштыр хоойлу-дүрүмге дүүшпес хөделиишкиннерни Туранның 15 харлыг өөреникчизи, а видеобижидилгени Аржаан школазының 16 харлыг школачызы кылганы илерээн. Ук болуушкун бо чылдың май эгезинде болганы тодараттынган. Амгы үеде ийи назы четпээн уруг социал албан черинде чурттавайн турар.
Оларның чурттап турар черин полиция ажылдакчылары тодараткан. Бо хүннерде хыналда ажылдары чоруп турар, ооң түңнелдери-биле назы четпээннерниң болгаш социал албан чериниң албан-дужаалдыг кижилериниң хөделиишкиннеринге үнелелди бээр дээрзин Тыва Республикада ИХЯ-ның парлалга албаны дыңнадып, ук чыгдынган материалдарны Россияның Истелге комитединиң Тыва Республикада эргелелиниң киирген дилээнге үндезилеп, аңаа дамчыткан дээрзин медеглээн.
Тыва Республикада ИХЯ-ның парлалга албанының медээзинден
А. ХЕРТЕК белеткээн.
"Шын" №44 2023 чылдың июнь 17