Эрткен неделяда Иркутск база Черногорск хоорайларга элээди оолдар, уруглар аразынга бүгү Россия чергелиг дзюдо маргылдааларынга бистиң мөгелеривис чедиишкинниг киришкеннер. Аңаа 50 килдиг оолдар аразынга Чадаананың ЦСКА-Тыва спорт школазындан Чылгычы Ондар 3-кү черни ап, хүлер медальга төлептиг болган. Уруглар аразынга 40 килге Меңги Донгак, 57 килге Аселжя Сат 2-ги черни чаалап ап, мөңгүн медальдар-биле шаңнатканнар.
Кызылдың “Олимп” спорт школазының мөгези Айслан Донгак 73 килден өрү мөгелер аразынга тиилеп, алдын медаль-биле шаңнаткан. Маргылдааныӊ түӊнелинде команда талазы-биле маргылдаага Иркутск командазы 1-ги черни, бистиң тыва мөгелерниң командазы 2-ги черни, Бурятияныӊ командазы 3-кү шаңналдыг черни алганнар.
Черногорск хоорайга болган бичии оолдар аразынга маргылдаага тыва мѳгелер Темирлан Куулар биле Мөңгүнай Монгуш 3-кү шаңналдыг черлерни ап, хүлер медальдарга төлептиг болганнар. Келир үеде Азия, Европа, Делегей, Олимпий оюннарынга тулган тиилекчилер, чемпионнар үнеринге бүзүрел бар.
Алексей ЧАМБАЛ-ООЛ.
Чуруктарны авторнуң архивинден алган.
«Шын» №17 2024 чылдың март 6
