“Эң эки муниципалдыг практика” деп Бүгү-российжи конкурста Тываның төлевилелдери киржип турар. Конкурстуң девискээр чадазынга киирген төлевилелдерни тускай комиссия сайгарып көргеш, конкурстуң федералдыг чадазынга дараазында номинацияларга киириштирери-биле 3 төлевилелди деткээн.
“Муниципалдыг экономика политиказы болгаш муниципалитеттиң саң-хөөзүн башкарары” номинацияга – Чөөн-Хемчик кожууннуң Шеми сумузунуң “Улусчу чөвүлел” практиказы. Тус черниң чурттакчы чонунуң бюджет инициативазының принцивинге үндезилеп, 1979 муң рубль акша-хөреңгини хаара тудуп, кагдынган бажыңны септээш, ус-шеверлерниң коворинг-төвүн ажытканы.
Коворинг-төпке 2021 чылда дааранылга, чазанылга болгаш алгы-кеш болбаазырадылгазының цехтерин ажыткан. Ол цехтерге 16 ажылчын туруштарны организастаан, сайгарлыкчыларның продукция бүдүрери 26 хууга, үндүрүг төлээри 12 хууга көвүдээн.
“Хоорай тудуунуң политиказы, чурттакчы чоннуң амыдырал-чуртталгазының байдалын экижидери болгаш чуртталга-коммунал ажыл- агыйын хөгжүдери” номинацияга – Бии-Хем кожууннуң Туран хоорайның “Туран хоорайның төп парыгында тыва күрүнениң тургузукчуларының бирээзи И.Г. Сафьянов аттыг шөлдүң чаагайжыдылгазы” төлевилел.
Төлевилелди 2021 чылда Тыва Арат Республиканың 100 чылынга уткуштур боттандырган. Ооң түңнелинде Туран хоорайның ниити байдалы экижээн, чурттакчы чоннуң дыштанырынга таарымчалыг шөл тывылган.
“Националдар аразында тайбыңны болгаш эп-найыралды быжыглаары дээш муниципалдыг деңнелге национал политиканың өске-даа хемчеглерин боттандырып чорудары” номинацияга – Кызыл хоорайның “Фестиваль-акция “Россияның чоннарын каттыштырары” төлевилел.
Республикада чурттап турар чоннарның культуразынче тус черниң чурттакчыларының кичээнгейин болгаш сонуургалын хаара тударынга төлевилел улуг ужур-дузалыг болган, националдар аразында харылзааларны быжыктырган.
Конкурстуң федералдыг деңнелге түңнелдерин 2022 чылдың ноябрь айда үндүрер. Конкурстуң тиилекчилеринге Россияның Чазааның дипломнарын болгаш акша шаңналдарын тыпсыр (көдээде чурттакчылыг черлерге – 3 миллиондан 20 миллион рубль, хоорайларга 10 миллиондан 50 миллион рубль чедир).