Кассага чыылган акша-хөреңгизи эрткен чылга деңнээрге, 1,3 млрд рубль ашкаш, 5,8 млрд рубль чедип, рекордту тургускан. Чаңчыл ёзугаар Кино фондузунуң деткимчези-биле тырттырган фильмнер эң-не тергиин кинолар санынче кирген.
Клим Шипенконуң “Холоп 2” деп комедиязы эң-не чедиишкинниг болган. Ону 6,5 сая көрүкчү көрген түңнелинде, 2,6 млрд рубль орулга кирген.
Ийиги черде – Алексей Нужновтуң “Бременские музыканты”. Ук тоолдуң 5,1 млн биледи саттынган соонда, 1,96 млрд рубль орулга кирген.
Тергиидээн көргүзүглерниң 3 дугаары “Три богатыря и Пуп Земли” болган. Бо мультфильмни 1,8 сая көрүкчү көргеш, 614 млн рубль орулганы эккелген.
Чүгле Чаа чылдың дыштаныр хонуктарында “Найырал” кинотеатрынче 5700 кижи кино көрүп барган.
Үстүнде ады кирген 3 көргүзүгнүң “Три богатыря и Пуп Земли” деп мультфильм Тывага тергиидээн. Дыштаныр хонуктарда 12 сеансты 1973 кижи көрген. Ийиги черде “Бременские музыканты” деп тоолду 13 катап көргүскен. “Холоп 2” деп комедияны 18 катап көргүзерге, 1828 кижи көрген.
Бистиң корр.
«Шын» №1 2024 чылдың январь 10