Эки хемчег болду

Радио, телевидениеден көрүп, дыңнап, солун-сеткүүлдерден номчуурга, Россияда бензин, солярка четчир, ооң хөй кезиин чурттуң иштинге ажыглаарын Владимир Путин боду безин чугаалаан боор чүве чорду. Президент ынчаар чугаалап турда, бензин чүгле Тывада эвес, бистиң чурттуң өске-даа девискээрлеринде эвээжеп, ооң өртээ улгадып турар-дыр. Та чүге ындыг чүве? Даштыкы күрүнелерже үндүр садып турары хөй бе?

Чуртталгада мындыг болгай, өг-бүлезин, уруг-дарыын аъш-чем, идик-хеп-биле четчир кылдыр хандырып алгаш, ооң соонда дөргүл-төрелдеринге, эш-өөрүнге, өске кижилерге эт-сеп, акша-төгерик-биле дузалажыр. Күрүнеге база ындыг болур ужурлуг эвес бе? Баштай чурттуң чонун долузу-биле хандырып алгаш, оон артканын даштыкыже үндүр садар. Азы эрге-чагырга Президент В.Путинниң айтыышкынын күүседип четтикпейн турары ол ирги бе? Бензин өртээ улгадырга, мындыг янзылыг бодалдар сагыш-сеткилге кирер боор чүве-дир.

Россияның төп девискээрлеринде бензин өртээ бистиң республикада өртээнден барык-ла 10 рубль хире аар болду. Ону төп телевидениеде медээлерден дыңнааш, деңнеп санап көрдүм. Төп черде 1 литр бензин өртээ 57 рубль, а бистиинде 67 рубль чеде берген. Бензинни Тываже киир сөөртүп турар болганда, ооң өртээ өзерин соксадыры берге херек болбайн аан. Бензин өртээн өйлээриниң дугайында хурал-суглааларны дыңнааш, ол-даа чөгенчиг херек боор деп херекке албайн турган мен. Ынчалза-даа Владислав Ховалыг Дарганың дараазында шиитпири мени элээн бодандырыпты. Ооң ол шиитпирин эки хемчег деп билдим. 1 литр бензинниң өртээн бензин кудар станциялар каш акшага улгаттырар болдур, ооң чамдык кезиин республиканың бюджединден дуглап бээр деп чүүл херек кырында дузалыг, тодаргай хемчег-дир. Кызыл хоорайдан ыракта, кожууннарда машина-балгаттыг кижилерге ол шору улуг материалдыг деткимче-дир.

Хурал-суглаага хөй чугаа-соотту эвээжеткеш, кижи чонга херек кырында дузалыг шиитпирни хүлээп алыры чүүлдүг херек-тир. Чүгле бензин өртээнге эвес, өске-даа нарын айтырыгларга шыңгыы-шыңгыы шиитпирлерни В. Ховалыг дарганың хүлээп аптарынга чүүлдүгзүнүп чор мен.

Олег ЧАГЖИИР, күш-ажылдың хоочуну.

«Шын» №73 2023 чылдың сентябрь 27