Долаана бойдузундан аажы-чаңын кырган-авазы Өшкү-Саардан дыка-ла дөзеп алган. Ооң сагыш-сеткилин бүдүү топтап көөрге, улуг энезиниң бурунгаар чүткүлдүүн, сайзыралче бурунгаар көрүштүүн төрээн адазы бо-ла эскерип каар.
Долаана Тамбаевна Хүрең-оол (шола ады Оля) Өөк сумузунга 1982 чылдың апрель 30-де төрүттүнген. Кызылдың эмчи колледжизин чедиишкинниг дооскаш, эмчи сестразы эртемниг болган. Баштайгы ажылчын базымнарын Кызылга, оон Туран хоорайның кожуун эмнелгезинге эмчи сестразы болуп ажылдап турган.
Өг-бүле тудуп, кады чурттаан эжи Николай Саая-биле ийи ажы-төлдүг болганнар. Амыдырал-чуртталгада дески чүве кайда боор, аас-кежиктиг аныяк өг-бүлеге тускай шериг операциязы эгелээни муңгаранчыг, дүвүренчиг хүннер болган. Кара чажындан тура Ада-чурттуң Улуг дайынынга киржип чораан кырган өгбелеринге, төрээн чуртунуң төлептиг патриоттары болурунга кижизидип каан аныяк өг-бүле удаа-дараа дайынче аъттаныпканнар.
Долаана Ямал-Ненец Автономнуг округка Салехард хоорайның шериг комиссариады-биле 2023 чылдың октябрь айда керээ чарып алгаш, Луганск хоорайдан 180 км ырак черде турар Новокрестьянка деп суурда эмчи салбырынга шериг хүлээлгезин күүседи берген. Барган кезээнде чуртун камгалажып, ок-боо адаанда чоруур Тывадан Өвүр кожуун чурттуг маадыр кыс Милана Ондар база бар болган.
Маадыр кыстарның хүлээлгезин күүседип турар санитар шериг кезээ дайын шөлүнге балыглаткан шериглерге баштайгы дуза чедирер база балыг-бышкын байдалын өөренип көргеш, балыгланган дайынчыны өске эмчи салбырларынче улаштыр дүрген дуза чедирери-биле, хан-чинниг дайын шөлүнден ырадыр болуп турар.
Чаңгыс-ла хүн дургузунда 20-30 хире балыгланган дайынчыларга дүрген эмчи дузазын чедирип турганнар. Дайын шөлүнче кирген соонда, херээжен кижи деп чиигелде турбас. Луганск облазының чурттакчыларын украин фашистер канчаар хилинчектеп, эриидеп, амы-тынындан чарып турганын чугаалаар аргажок дерзии.
Эрес-дидим, коргуш чок маадыр кыстарывыс хире-хире болгаш-ла командирлериниң айтыышкыны-биле дайын шөлүнде балыгланган дайынчыга дуза чедирип, мырыңай чаа-ла доозулган тулчуушкуннуң чазылган снарядының дарызының өрттенген чыды безин читпээн оңгуларга барып чедип турганнар. Ында-мында уё-човуур, өлүм-чидим...
Тускай шериг операциязының мурнунга салдынган сорулгаларны күүседип, шериг чурумну эки сагып турары дээш, ефрейтор Долаана Хүрең-оолду 144 гвардейжи мото-адыгжы дивизияның баштаар чери Хүндүлел бижик-биле шаңнаан.
Тускай шериг операциязы эгелээнден бээр 1640 дугаар хонук хуусаазы чедип, дайын-чаа ам-даа адакталбаан. Маадыр кыстарывыска тайбың ак-көк дээрни чаалажып эккеп бээринге бүзүреп, өг-бүлезинге, ал-боттарынга чаагай чолду төрел-дөргүлүнүң мурнундан йөрээп каалыңар!
/ Тамба ХҮРЕҢ-ООЛ.
Туран хоорай.
Чурукту өг-бүле архивинден алган.
“Шын” №19 2026 чылдың май 21
"Шын" солуннуң МАХ-каналынга каттыжыңар max.ru/join/egenQ...