Ажыл шагының сөөлүнде чүве, чанып кел чорумда, Эдерер бо-ла кылаштап чор. Ооң-биле кудумчуну куду алзы хөөрежип бадып ор бис.
— Ажыл-херек кандыг чоруп тур? – деп оон чугаа ээреп айтырдым.
— Ажыл-херек-даа мындыг ийин, бир болган таварылганы сеңээ чугаалап бээйн — дээш, чугаалады.
— Ажылга үргүлчү озалдап чедер кижи мен. Баштай даргам мени эскербейн эрттирип-ле турган. Ийи-үш-даа удаа озалдаан мен. Кандыг-даа чүвениң өйү кээр, ажыл-херектиң эрге-ажыы деп чүве бар болгай. Аяам дола бербес ийикпе. Хурал-суглаа, шеф-даа болганда озалдаар, сургакчылаашкын чорааш, хонук-хуусаазын эрттир чоруур турдум. Улус мээң-биле чеже эптежир, бажым эъттендирер дээр сен. Ажылдан озалдаар чоруум дээш хурал-суглаага каш удаа хемчээттиргеш, ам-на кезей бердим. Эң сөөлгү доңгулда алган кижи мен. Доңгулда-даа болза өй-хемчээлдиг чүве ыйнаан, ам озалдаар болза ажылдан үндүр хөөгледир апаар.
Бир-ле катап дүъште бажыңга келгеш, чемненип алгаш, диван кырынга удумзурай берип, отту чаштап келдим. Шагымны көөрүмге каш-ла минута арткан. Кижи далажырга ана өштүг чүве, дүвү далаш тура халааш, буу-хаа кеттингеш, ыңай-ла болдум. Элээн ырап келгеш көрген, костюм чок, майкалыг болдум. Ажылче ынчаан баар эвес дээш, дедир-ле бажыңымче ыдыптым. Костюмну буу-хаа кеде тырткаш, кара маң-биле дедир-ле халыптым. Ам база хемчээдирим ол-дур дээш мырыңай тын тынмайн маңнап оргаш, тайып уштум. Аарыырынга шыдашпайн алгырыпкан-дыр мен. Элдеп чүве оттуп келдим. Ол бүгү дүжүм болду. Амыраанымны чүү дээр силер. Хурал, эш-өөр меңээ ол хире дээштиг болган-дыр. Оон бээр ам ажылымдан озалдавас, шакка чагыртыр апарган мен. Кезеп деп чүве ындыг боор-дур, дуңмам — дээш, ол чугаазын доосту.
/ Чечекмаа ОНДАР-ООЛ, күш-ажылдың хоочуну.
Кызыл хоорай.
Чурукту ГигаЧатка чураан.
“Шын” №23 2026 чылдың июнь 18
"Шын" солуннуң МАХ-каналынга каттыжыңар: max.ru/join/egenQ...