Тываның суурлары «республиканың эң элээр сууру» ат дээш шылгажыр. Регионнуң Чазаа “Элээр суур – 2022” мөөрейниң эгелээнин чарлаан.
Тываның чурттакчылыг көдээ суурларында арага аймаан ижерин эвээжедиринче чонну кыйгырып, эзирик байдалдыг кем-херек үүлгедиишкиннериниң санын эвээжедир сорулга-биле мөөрейни эрттирип турарын Чазактың доктаалында айыткан.
Мөөрей хемчеглеринде көдээниң чонунуң хөй-ниити ажылдарынга идепкейин көдүрүп, сумуда тус чер бот-башкарылгазының органнары-биле кады ажылдажылгазын күштелдирери көрдүнген. Оон аңгыда организаторлар арага аймаан ижерин эвээжедиринче угланган ажылдың ачызында “эзирик” кем-херектер санын эвээжеткен муниципалдыг черлерниң эки арга-дуржулгаларын илередип, ону нептередир сорулганы мурнунда салган.
Мөөрей дөрт чадага эртер. Бир дугаарында – суурлар “элээр девискээр” деп боттарын чарлаар: чон чыыжының шиитпиринге даянып, кожуун чагыргазының деңнелинге ооң дугайында шиитпирни үндүрер. Мөөрейниң сорулгазын боттандырган хемчеглер планын бадылаар. Ийиги чадада – конкурска киржир чагыгларны киирери. Чагыгларны сентябрь 7-ге чедир ТР-ниң Баштыңының Администрациязы ТР-ниң Чазааның Аппарадының регион айыыл чок чоруунуң департаментизинче киирер. Эң харыысалгалыг болгаш үргүлчүлелдиг үшкү чадазы – мөөрейниң бодун эрттирери. Дөрт дугаарында – түңнелдерни үндүрери.
Мөөрей чорудуу-биле кылдынган ажылдарның түңнелдерин 2023 чылдың январьда сайгарар.
Тиилекчилерни үш бөлүкке илередир: муңдан хөй чурттакчылыг улуг суурлар, ийи чүстен бир муң хире чурттакчылыг ортумак суурлар, ийи чүстен эвээш чурттакчылыг бичии суурлар. Бөлүк бүрүзүнге акша шаңналдыг үш черни үндүрер. Бирги база ийиги бөлүкке тиилээннер сая-сая акшаны алыр. Бирги черни алган бичии суурга шаңнал кылдыр 600 муң рубльди тыпсыр.
Тываның Чазааның парлалга албаны.