Ай бурунгаар хенертен аарый бээримге, уругларым мени кожууннуң ниити аарыглар эмнелгезиниң чыдар салбырынга чедире берген. Эмчилер мени дораан чыттыргаш, анализимни алдылар. Өкпемниң ийи талазынга дегдирген болдум. Бажым дээскинер. Эмчилер мени чаш уруг ышкаш чедип алгаш, каяа черле чедирбедилер дээр: рентген, УЗИ, КТ, ФГДС дээш шуптузун эртим.
Магалыг чүве-дир, чонум, үениң аайы-биле эмнелгелеривистиң дериг-херекселдери чаарттынып, аарыг чонувус хөйү-биле эмнедип, сегип үнүп турарынга канчап өөрүвес боор.
Назы-харым улгады берген кижи эмчилеримни, ажы-төлүмнү орай дүне коргудуп, бака-ла девидедип, шүүдеттим. Неделя ажыр дамырымче эмнер дамдыладып, мени база катап чырык хүннүң адаанга чурттаар кылдыр бут кырынга тургузуп, эмнеп каан ак халаттыг, «алдын холдуг» эмчим Долгар Александровнага, эмчи сестразы Сайлык Херел-ооловнага, ажаап-тежээп турган кыстарым Роза Костеевнага, Шеңне Ширин-ооловнага база өске-даа эмнелге ажылдакчыларынга четтиргеним илередип, черге чедир мөгейдим.
Эмчилерниң дүн-хүн, амыр-дыш чок берге чымыштыг ажыл-ижинге чүгле экини, чедиишкиннерни күзедим. Сүлде сүзүүңер, хей-аъдыңар бедик-ле болзун!
Яра МОНГУШ, күш-ажылдың хоочуну.
Чөөн-Хемчик кожуун,Теве-Хая сумузу.
«Шын» №89 2023 чылдың ноябрь 22