Тывада бо хүннерде 29 эмнелге баш удур бижидиишкин-биле пациентилерни хүлээп турар. 2023 чылдың январь 1-ден эгелээш, 91 744 кижи ол арганы ажыглап, эмчилеп алган.
Чонга эптиг байдалдарны тургузары-биле ТР-ниң Кадык камгалал яамызы "Мобилдиг пациент" деп капсырылганы ажылдап кылган. Ук капсырылганы RuStore азы https://minzdravtuva.ru/приложение.html айтыг-биле киирип алыр. Капсырылгага бүрүткедирде, пациентиниң эмчи картазында бижиттинген телефонунуң дугаарын киирери чугула. Капсырылгага бүрүткедип тургаш, бергедээшкиннер тургустунуп келзе, 2-23-52 дугаарже долгааш, айтырып алыр.
Чыл эгезинден бо хүнге чедир "Мобилдиг пациент" капсырылга таварыштыр 239 пациент баш удур бижидип алгаш, эмчи шинчилгезин эртип алган.
Күрүне ачы-дузазы портал (госуслуги) таварыштыр - 48 377, поликлиникаларда салган информаттар таварыштыр - 1647, а call-төптер таварыштыр - 23 255, эмнелгелерде бүрүткел килдистерин таварыштыр - 18 226 пациент баш удур бижидип, эмчи шинчилгезин эртип алган.
Ниити аарыглар эмчизи болгаш бичии уруглар эмчилери аңгы-аңгы специалистерже көргүзүглериниң аайы-биле баш удур бижидип берип болур дээрзин сагындыраал.
Улуг-даа, бичии-даа улуска диш эмчизинче баш удур бижидилге кылыры нарын болуп артпышаан. Ынчангаш Тываның Кадык камгалал яамызының шиитпири-биле бичии уругларга болгаш улуг улуска немей диш эмчизиниң кабинеттерин ажыткан. Бичии уругларга диш эмнээр кабинет Кызыл хоорайның Правобережная кудумчузунуң 50 дугаар бажыңында. Оон ыңай Кызыл хоорайның 3, 8, 15, 16, 17, 18 болгаш Улуг-Хемниң Ийи-Тал суурда школа-интернатта диш эмнээр кабинеттер ажылдап эгелээн.
Электроннуг бижидилгеге немей 2-95-00 дугаарлыг cаll-төп ажылдап турар. Ук дугаарже долгааш, билдинмес чүүлдерни айтырып болур. Оон аңгыда, ол төпте "манаашкынның" дептери база ажылдап турар. Ук дептерде 32 улуг, 203 бичии уруглар баш удур бижидериниң ээлчээн манап чыдар. Баш удур бижидилгениң чартыы "манаашкынның" дептеринден, а бир чамдыызы чаа пациентилер болур ужурлуг. "Манаашкынның" дептеринче киир бижидерде, 3-09-05 дугаарлыг телефонче долгаар.
Пациент бүрүзүн 30 минута дургузунда шинчээн азы эмнээн турар ужурлуг. Бир диш эмчизи хүнзедир 12 пациентини хүлээр. Оларның 8-зи чаа, а 4-ү катап келген пациентилер болур ужурлуг.
Амгы үеде хүнде 250 улуг-биче пациентилерни күрүнениң диш эмнелгези хүлээп турар.
ТР-ниң Кадык камгалалының парлалга албанының медээлеринден А.Ондар белеткээн.
